Tungod sa problema, amahan naghikog
CEBU, Philippines – Gumikan sa problema sa kuwarta ug pamilya naghikog patay ang usa ka amahan sa sitio Bon-ami, barangay Labangon, dakbayan sa Sugbo pasado alas 3:00 sa niaging kadlawon.
Ang nagpakamatay naila nga si Melvin Dela Cerna, 41, wala’y trabaho ug nagpuyo sa maong lugar.
Sa imbestigasyon sa homicide section sa Cebu City Police Office, gitug-an ni SPO2 Rommel Bancog nga dugay na nga nagbahad si Dela Cerna sa iyang kapuyo nga maghikog apan gibaliwala lang.
Kagahapo’ng adlawa nag-inusara nga nabilin sa ilang balay si Dela Cerna ug pasado alas 3 na sa kadlawon nauli ang iyang anak ug ang iyang kapuyo nga si Joan Zapra.
Apan daku na lang kahibulong nga sa ilang pag-abli sa balay ila na lang nakita nga nagbitay na si Dela Cerna gamit ang cable wire nga gihigut sa beam sa ilang balay.
“Nagsige na daw og bahad nga maghikog, wala lang nila pansina. Problema sa kuwarta ug personal nga problema ang nakuha nato nga hinungdan,” sumala pa ni Bancog. – /GMR) (BANAT NEWS)
- Latest