Duha ka babaye “nanglayat” sa duha ka bridge

CEBU, Philippines - Duha ka mga babaye ang nangatagak gikan sa Marcelo Fernan Bridge ug Mandaue-Mactan Bridge sa managlahing oras, usa kanila ang namatay samtang ang usa nalandig sa tambalanan.

Wala pa hiilhi sa mga imbestigador sa Homicide Section sa Lapu-Lapu City Police Office ang usa ka babaye nga gibanabanang 25 ngadto sa 30 anyos nga giingong natagak gikan sa Marcelo Fernan Bridge  sa habig nga bahin sa Barangay Pusok.

Sumala pa sa tigbalita sa TV 5 Cebu nga nakakuha og footage sa dapit nga gitugpahan sa babaye, ang maong babaye nagsuot og itom nga shorts ug puti nga t-shirt mitugpa sa sementadong bahin sa ubos nga maayong pagkaguba sa iyang kalawasan.

Si Police Officer 1 Jomar Florentino sa Homicide Section miingon nga alas-11 pasado niadtong Sabado sa gabii dihang nakit-an ang maong babaye nga giingong miambak gikan sa maong taytayan.

Way na-recover nga ID o mga dokumento nga posibleng ilhanan sa maong babaye.

Paglabay sa duha ka oras, laing babaye na usab ang milayat sa Mandaue-Mactan Bridge nga mitugpa sa dagat ug daling naluwas sa mga residente sa Sitio Seaside, Pajo sa dakbayan sa Lapu-Lapu.

Ang maong 21-anyos nga babaye kansang pangalan gipugngan sa Banat News gikatahong dunay kaubang wala pa mailhing lalaki nga langyaw nga iyang uyab.

Matud pa nga naglalis ang duha niadtong tungora ug sunod nga nahitabo natagak na ang babaye sa maong taytayan, wala hinuon matino kun misuway pagpakamatay ang babaye o gitukmod kini sa maong langyaw.

Sumala pa nga usa ka molupyo sa maong dapit ang nakabantay sa pagtibugsok sa maong babaye sa dagat ug dali niya kining giluwas ug gidala sa Vicente Sotto Memorial Medical Center tungod kay nagsuka-suka kini.

Ang kapolisan padayon pa sa ilang imbestigasyon sa maong duha ka managlahing insidente sa pagkatagak sa duha ka babaye gikan sa duha ka mga taytayan.  (BANAT NEWS)