Obiena bigo sa Stockholm Diamond League
MANILA, Philippines — Matapos maghari sa isang torneo noong nakaraang linggo ay bigo si national pole vaulter Ernest John Obiena na makasikwat ng medalya sa sinalihang Stockholm Diamond League sa Sweden.
Lumundag ang World No. 6 na si Obiena ng 5.73 meters para tumapos sa sixth place sa hanay ng walong partisipante.
Mas mababa ito kumpara sa inilista niyang bagong season-best na 5.92m sa pagkopo sa gold medal sa Taby Stavhoppsgala sa Taby, Sweden kamakailan.
Napatalsik sa labanan sa Stockholm Diamond League ang 6-foot-2 na si Obiena matapos mabigong malundag ang 5.83m sa kanyang tatlong pagtatangka.
Si Olympic Games champion Mondo Duplantis ng Sweden ang sumikwat sa gold medal sa itinalang bagong personal best na 6.16m kasunod sina American Christopher Nilsen (5.93) at 2016 Olympics winner Thiago Braz (5.93m) ng Brazil.
Susunod na sasalang si Obiena sa World Athletics Championships sa Hulyo 15-24 sa Eugene, Oregon.
- Latest