Ebidensiya dapat ang manaig

Sa anumang imbestigasyon, hindi rami ng alegasyon ang mahalaga kundi tibay ng ebidensya. Maaaring magdagdag ng isa, dalawa, o tatlong paratang laban sa isang tao, ngunit kung hindi malinaw ang mga batayan, nananatiling mga tanong pa rin ang mga ito at hindi katotohanan.

Ito ang usaping lumilitaw sa mga alegasyong iniuugnay ni Senador Ping Lacson kay Senador Alan Peter Cayetano.

Una ay ang usapin ng mga umano’y “ghost projects” sa Taguig. Mabigat na paratang ito dahil pera ng taumbayan ang nakataya. Ngunit sa mga pagdinig, may mga opisyal na nagsabing may mga proyektong aktwal na naipatupad at may nakikitang accomplishment. Kung may kakulangan sa dokumentasyon, dapat itong linawin. Ngunit iba ang usapin ng mga depektong papeles sa paratang na walang proyektong naipatayo.

Sumunod naman ang isyu ng reclamation sa Laguna de Bay. Nararapat lamang na siyasatin kung nasunod ang mga permit at rekisito ng batas. Ngunit ang posibleng paglabag sa proseso ay hindi awtomatikong katumbas ng personal na pananagutan ng isang opisyal. Kailangang may malinaw na ebidensyang mag-uugnay dito.

Lumitaw rin ang usapin ng mga umano’y “fake titles.” Ngunit mahalagang maging maingat sa paggamit ng mga termino. Ang isang titulong may isyu sa records o registration ay hindi agad nangangahulugang peke. Mahalaga ang pagkakaibang ito upang hindi maligaw ang pag-unawa ng publiko sa tunay na kalagayan ng kaso.

Mahalaga ang papel ng Senado bilang tagapagbantay ng pananagutan sa pamahalaan. Ngunit kasabay nito ang obligasyong maging patas, maingat at nakabatay sa mga katotohanan.

Sa huli, hindi ang dami ng paratang ang dapat maging sukatan ng katotohanan. Ang dapat manaig ay ang lakas ng ebidensya at ang integridad ng proseso.

At iyon ang patuloy na inaasahan ng publiko mula sa anumang imbestigasyon.