Litaniya sa kasaypanan

Pipila sa mga sayop ni Gobernador Gwen Garcia sa Sugbo sa pagduma sa COVID-19:

• Pila ka buwan sa wa pa mo-ulbo ang pandemya, iyang gi-outsource ang healthcare workers sa mga ospital sa probinsiya. Mahimong mapasaylo nga wa magpaabot sa pandemya pero way rason ang kinadatoan nga probiniya sa Pilipinas nga motugyan sa kinabuhi ug kahimsog sa mga Sugbuanon ngadto sa placement agencies.

 * * *

• Pagsulbong sa mga kaso sa COVID-19, gi-promote niya ang tuob nga panagang sa kagaw, gigamit ang mga mayor isip models sa tuob, ug gipakauwawan sa iyang press conferences ang mga doktor nga nangahas pag-awhag niya pagpatigbabaw sa siyensiya.

• Gipamugos niya ang air purifiers isip panagang sa COVID-19 bisan sa pasidaan sa Department of Health (DOH) ug health experts nga way ebidensiya nga makatabang sa pagbugaw sa kagaw.

 * * *

• Pagsugod sa pagpamakuna batok sa COVID-19, mas gipanalipdan niya ang katungod sa mga di magpabakuna kay sa pagdasig sa katawhan --labi nang senior citizens ug mga masakiton nga labing nameligrong matakdan ug mangamatay-- sa pagpabakuna. Resulta? Sugbo ang ikaduhang iwit sa pagpamakuna sa Central Visayas. Naapsan sa mga probinsiya sa Siquijor ug Bohol nga di sama kadato ni kadaghan og kahimanan. Bugtong nakalabaw sa katapolan mao ang Negros Oriental.

• Gipaluagan niya ang mga lagda pagdawat sa mga pasahero gikan sa ubang kanasuran nga nitugpa sa Mactan-Cebu International Airport. Nga maoy gipasanginlan sa mga eksperto sa DOH nga rason sa mas sayo ug paspas nga pagkatap sa Omicron sa Kabisay-an ug Mindanao.

 * * *

• Gihimo niyang optional ang pagsul-ob og face mask sa open spaces sa way pagkonsulta sa DOH ug ubang health experts. Niinsistir sa iyang lagda bisan sa tambag sa DOH nga kinahanglang uniporme nga ipatuman ang mga lagda sa Inter-Agency Task Force (IATF) sa tibuok nasud aron kalikayan ang laing pagsulbong sa mga kaso tungod sa presensiya sa mas mananakod nga subvariants sa Omicron sa Metro Manila ug ubang bahin sa nasud.

• Gidid-an niya ang mga polis sa pagdakop sa mga masakpan nga wa mag-face mask. Naapiki ang hepe sa Cebu Provincial Police Office nga si Tenyente Koronel Engelbert Soriano nga gipa-resign ni PNP Chief Vicente Danao Jr. human gipasanginlan nga nisipsip ug namolitika.