Rekomendasyon sa COA

Karibalan lang ang pagpatuyang ni Cebu City Mayor Edgar Labella og wara-wara sa “unmodified opinion” sa Commission on Audit (COA) nga ebidensiya sa katarong sa mga transaksiyon sa iyang pamunoan sa 2020 sa pagpaugat ni City Administrator Floro Casas Jr., bisan naklaro na nga ang “unmodified opinion” para sa presentasyon sa ilang financial statement, nga gi-absuwelto na sila sa COA human napasabot ang gibadlong nga mga transaksiyon nga nigasto og dul-an P200 milyones.

Ang wa angkona ni Casas mao nga nahisgutan siya sa COA report. Di tungod sa katarung. Kon dili tungod sa pag-aprobar niya sa mga transaksiyon nga way pagtugot gikan sa mayor.

***

Nirekomendar ang COA nga kurihian ang mga lagda sa Cebu City Hall nga ang mga dokumento sa mga transaksiyon nga balor og kapin sa P25 milyones mahimo rang pirmahan sa nagkalainlaing opisyal. Mayoriya sa mga dokumento nga nasubli sa COA way pirma ni Labella kon dili ni Casas ra.

Ang implikasyon sa mga dokumento, segun sa COA, mao nga gitugyan ni Labella ang iyang mga gahom ug responsibilidad ngadto ni Casas. Sa laing pagkasulti, nipuno ang COA, makahimo si Casas pagpirma sa mga dokumento sa tanang transaksiyon sa City Hall bisan pila pay kantidad.

***

Gipasabot sa COA ang mga risgo kon di makurhian ang mga buslot sa internal control system sa City Hall:

- Mahimong mosud si Casas sa bisan unsang transaksiyon sa way pagpahibawo ni pagpananghid ni Labella; ug

- Kon mabulilyaso ang mga transaksiyon, lisod ang pagtino kinsa ang responsable kay gisaw-an man nilang Labella ug Casas ang mga gahom ug mga gimbuhaton.

***

Gipahibawo ni Casas nga mobalik na pagtrabaho si Labella ugma human na-ospital sa niaging semana. Hinaut nga himsog nang mayor pagpasabot sa eskandalong nadiskubrehan sa COA:

- Nganong gipasagdan man niya si Casas nga maoy magbuot sa kasagaran sa mga transaksiyon sa City Hall?;

- Nganong gitugyan man niyang Casas ang iyang mga gahom ug responsibilidad nga, segun sa COA, way superbisyon?; ug

- Tinuod bang napugos ra siya pagyanguyango sa mga transaksiyon ni Casas kay mas grabe ang iyang sakit kay sa iyang gitug-an ug nga si Casas igo ra sang gidiktaran sa tinuod nga hawod sa City Hall?