Gikahadlokan pero gilinguglingogan

Ambot unsa ang mas makapaalarma:

- Si Presidente Rodrigo Duterte nga, sa way konsultasyon ni bisan unsa nga pagtuon, nikalit lang og basura sa lagda nga gipanalipdan sa iyang mga eksperto sa Department of Health (DOH) ug Inter-Agency Task Force (IATF) nga makatabang pagbadlong sa tinakdanay sa COVID-19;

- Ang pag-angkon sa iyang tigpamaba nga bisan unsa ang isulti sa presidente mahimong opisyal nga lagda;

- Ang pahibawo sa Malakanyang nga bisan sa bag-ong lagda nga gipahibawo sa presidente ang karaan gihapon nga lagda sa IATF mao ang padayon nga ipatuman.

***

Ang labing uwahi nga kalibogan nasentro sa kapuslanan sa face shield. Pero mahimo nga morepresentar sa hapit tanang aspeto sa pagduma sa pandemya sukad sa pagsugod ini kapin na sa tuig ang nilabay.

Pananglitan, nipasidaan na ang DOH sa kaseryuso sa kagaw nga wa pay ngan niadtong Enero sa niaging tuig; nga gisaukwahi sa presidente kinsa nipasalig nga di kasud ang kagaw kay init ang Pilipinas ug kublan ang mga Pilipinhon; pero salamat na lang nga ang mas higpit nga mga lagda sa DOH mao ang aktuwal nga napatuman.

***

 Laing pananglitan:

- Ang iyang sugo nga dakpon ang tanang masakpan nga magtapuk-tapok ug unahon pagpriso ang barangay kapitan nga wa kabadlong sa kalapasan nisukwahi sa nahaunang sugo sa Department of Justice (DOJ) ug Department of Interior and Local Government (DILG) nga di na dakpon ang mga makalapas sa mga lagda sa community quarantine; pero

- Gipatigbabaw sa kapolisan ang sugo sa DOJ ug DILG ug ang mga barangay kapitan ra sa mga lugar sa tapuk-tapok maoy gikasohan.

***

Makapaalarma nang daan nga duna tay presidente nga mopataka lang og buka sa iyang baba ug isulti ang bisan unsa nga masud sa iyang hunahuna sa way pagsusi pinasikad ba sa siyensiya ug makaayo ba sa kadaghanan.

Ambot mas makapaalarma ba, o angayng pasalamatan, nga ang presidente labihang isoga, mopasidaan og patay sa tanang kahigayonan, gibalikbalik nga siyay gipili, nga iya ang mga polis ug mga sundawo, ug mao nga iyang gusto ang matuman, pero kasagaran sa iyang mga gipanulti giyangu-yangoan lang sa hingtungdan nga mga opisyal sa atubangan, pero way bisan usa nilang nagtagad sa pagpatuman.