_freeman
^

Bistado nang tua kapusta sa pikas

ARANGKADA - Leo Lastimosa (The Freeman) - May 1, 2021 - 12:00am

Mas maayo pang moangkon na lang si Presidente Rodrigo Duterte nga hadlok siya sa China maong, lahi sa pangisog sa iyang mga tinudlo nga silang Defense Secretary Delfin Lorenzana ug Foreign Affairs Secretary Teodoro Locsin, di siyang kapalayas sa gatosan ka maritime militia boats gikan sa West Philippine Sea.

Ug pakapinan na lang sab niya og tug-an unsay higot sa China niya. Ang binilyon ba ka pesos nga pautang nga gisaad sa China pero wa moabot? O may laing pabor nga nadawat maong di kahimo sa iyang naandan nga isog-isog?

***

Kon mosuway og tabon sa iyang katalawan pinaagi sa pagbasol sa gisundang pamunoan, kay igo lang nakasapupo sa ilang hugaw, mosamot kalig-on ang mga pasangil sa iyang pagbudhi sa nasudnong interes.

Pananglitan, ang pagsakmit sa China sa Scarborough Shoal niadtong 2012 di tungod sa pagpangiyugpos ni kanhi Presidente Noynoy Aquino. Kon dili tungod sa paglapas sa China sa kasabutan, ubos sa pagpataliwa sa Estados Unidos, nga magdungan og pahawa ang mga barko sa Pilipinas ug China. Di matulisok si Aquino sa pagtuman sa kauyonan. Ang kabakakon sa China maoy angayng tungluhon.

***

Ang pangilad sa Scarborough Shoal nakaaghat sa Pilipinas pagkiha sa China sa The Hague. Uban ang tabang ni Antonio Carpio, nga bisan sa tanang bugalbugal di kalabwan ni Presidente Duterte sa kasuhito sa balaod, nidaog ang Pilipinas ug gibasura sa Permanent Court of Arbitration ang pag-angkon sa China sa tibuok South China Sea.

Gawas nga wa modangop sa United Nations (UN) aron mapatuman ang desisyon, gipadaplin ni Duterte ang kadaogan kay nakigsuod ni Presidente Xi Jinping. Human sa mga ulug-ulog, gipakita siya sa China sa nilang nilang kamapahimuslanon.

***

Dihang gisakmit sa China ang Sandy Cay (sandbar nga kinadul-an sa Pagasa Island sa Pilipinas) atol na sa iyang pamunoan, tak-om ang presidente. Dihang gitukoran sa China og mga baseng militar ang mga isla nga gipanag-iya sa Pilipinas, nangiyugpos siya. Dihang gibanggaan sa Chinese militia boat ang fishing boat Gem-Ver, giduphan niya ang China.

Klaro pa sa udtong tutok hain kapusta si Presidente Duterte. Di kapangangkon ang katawhang Pilipinhon, nga nabalaka sa paugat nga pag-ilog sa kabahin sa atong nasudnong teritoryo, nga ila siyang alyado.

DELFIN LORENZANA
Philstar
  • Latest
Latest
Latest
Recommended
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

FORGOT PASSWORD?
SIGN IN
or sign in with