Nagkabulingit sa ilang lapok
Lahi sa nangaging mga pasangil batok sa iyang mga kaatbang nga dihang nihungaw gisalikway ni Presidente Rodrigo Duterte nga wa siyay labot, di siyang kapanghunaw ning makauuwaw nga bulilyaso sa labing uwahing dokumento nga gipagawas sa Malakanyang batok sa mga abogado ug mga sakop sa media nga gitumbok nga nagplano sa pagpalagpot niya sa katungdanan.
Kay sa wa pa siyang kapangita og planggana nga kahunawan, giangkon na sa iyang pinangga nga tigpamaba nga si Salvador Panelo nga gikan sa presidente ang dokumento ug nga hinatag sa laing nasud ang kasayuran.
***
Nahimong kataw-anan ang pag-insistir ni Panelo nga angayng tuohan ang bisan unsang kasayuran gikan sa presidente tungod sa kadaghan ug kakasaligan sa iyang mga tinubdan kay gisukwahi dayon ang kaseryuso sa mga pasangil sa labing menos duha ka buhatan sa gobyerno:
•Ang Armed Forces of the Philippines (AFP) nitataw nga wa silay namatikdan nga bisan unsang hulga sa pagpalagpot ni Presidente Duterte sa katungdanan; ug
•Ang Department of Justice (DOJ) niangkon nga wa silay nakita nga sukaranan sa pag-imbestigar sa mga abogado ug mga sakop sa media nga ginganlan.
***
Lain nga kauwawan mao ang pagkurihir sa pipila ka data scientists ni Presidente Duterte ug sa naghatag niya sa dokumento nga:
•Di matrix ang ilang gipakita kon dili network graph; ug
•Ang gilista nga IP (Internet Protocol) addresses makita ni bisan kinsa online, gawas sa usa (266) nga di igkita kay ang IPV4 (Internet Protocol Version 4), ang sistema sa pagdestino og IP address sa matag kahimanan nga mogamit sa internet, kutob ra sa 255.
***
Nabantang sab nga ang tinubdan ni Presidente Duterte ignorante sa social media: Ang serye sa mga exposé ni alyas Bikoy (nga utrong way ebidensiya) mas paspas nga napakatap nga wa i-agi og imbudo, kay ang URL sa YouTube natultolan sa mas daghan kay sa websites sa Rappler, Philippine Center for Investigative Journalism (PCIJ), metrobalita.net ug National Union of Peoples’ Lawyers (NUPL).
Labihan kabusluton sa dokumento ni Presidente Duterte nga gibandilyo sa bugtong pamantalaan nga iyang gihatagan og kopya, nga ang editor, nga mahimo ra g’yud untang magpakahilom sa pakauwaw sa ilang tag-iya, isog nga nipili sa pagbiya sa katungdanan.
- Latest
