Pataka lang diay og yawit

Nagpataka lang diay si Foreign Affairs Secretary Teodoro Locsin Jr. Human nisunod ni US President Donald Trump sa paggamit sa Twitter sa pagluwat og mahinungdanon nga mga pahibawo, gipasanginlan si Locsin nga nikopya sab sa ka-iresponsable ni Trump. Karon pa lang nitumaw na ang duha ka posibleng sayop nga kasayuran nga iyang gipakatap:

• Una, nga gikawat sa usa ka pribadong kontraktor ang kasayuran sa mga pasaporte sa minilyon ka Pilipinhon; ug

• Ikaduha, tungod sa kawat kinahanglan nga mopakita og birth certificate ang mga aplikante sa di pa ma-renew ang ilang pasaporte.

* * *

Gikurhian si Locsin sa iya mismong kauban sa pamunoan ni Presidente Rodrigo Duterte ug opisyal sa Department of Foreign Affairs (DFA):

• Si Kanhi DFA secretary Perfecto Yasay Jr. niingon nga way passport data nga nakawat; ug

• Si DFA Assistant Secretary Elmer Cato nipasabot nga di na kinahanglang mopakita og birth certificate ang tanang naghupot og pasaporte karon, ang awhagon ra pagduso og birth certificate mao rang naghupot og karaang mga pasaporte sa wa pa ipanghatag ang e-passport sugod niadtong 2009.

* * *

Samtang nagdumili pag-angkon sa iyang pataka, nikumpisal si Locsin nga kuwang siya og kasayuran unsa g’yuy nahitabo. Nga naklaro nang daan sa kalutaw sa pasiuna niyang tweets: Nga di pa siya kahingan og mga ngan apan mohingan siya og mga ngan kon pakauwawan siya sa pribadong kontraktor pinaagi sa social media.

Niluwat sab siya og laing makalibog nga katin-awan nganong wa mabadlong ang pribadong kontraktor: Wa mi gihimo, o wa mi mahimo, kay kami (gipasabot ba niya ang DFA?) ang sayop. Di na ni mausab.

* * *

Ang kakuwang og kasayuran ni Locsin sa mga kontrata sa DFA, Bangko Sentral ng Pilipinas, Francois-Charles Oberthur Fiduciare of France, ug APO Production Unit Inc. wa kapugong niya pagluwat og duha ka seryusong pasangil:

• Nga ang anomaliya nagsugod sa pamunoan ni kanhi presidente Gloria Macapagal Arroyo ug nigrabe sa pamunoan ni kanhi presidente Noynoy Aquino; ug

• Nga ang labing gikuyawan sa iyang pagbisto sa kahiwian mao ang mga kanhi kalihim sa DFA (giapil ba niya og tulisok silang Yasay ug kanhi DFA secretary Alan Peter Cayetano nga pulos mga alyado ni Presidente Duterte?).