Hulga ni Auring ug Bising
ARANGKADA - Leo Lastimosa (The Freeman) - January 7, 2017 - 12:00am

Human nisimang ug nahilis ang nangaging mga bagyo og low pressure area (LPA) nga nihulga sa Sugbo sa niaging Pasko ug Bag-ong Tuig, hingpit ang pasalamat sa mga Sugbuanon nga wa nay nihatag og samang importansiya sa nisunod nga forecasts sa PAGASA. Bisan sa pasidaan nga nikusog ang Amihan ug posibleng makaapektar sa fluvial procession sa bisperas sa Piyesta Senyor, ang mga pangutana sa mga Sugbuanon nipuntirya ra sa kahigayonan sa pag-uwan sa sayong buntag, sa hapon ug sa sayong gabii.

Bisan may nag-ung-ong nang LPA sa Hinatuan, Surigao del Sur, kansang ikog (nga gitawag sa mga eksperto og “trough”) maoy gibasol sa uwan, wa gyoy nagpaabot nga may seryusong hulga sa panahon.

***

Maong labihan nakong kuganga sa pagpanawag ni PAGASA Visayas Director Oscar Tabada (nga kaingon gani nakong nagbakasyon pa) gahapon sa buntag nga mabalak-on nga nagpahibawo sa nag-ung-ong nga di lang usa kun dili duha gyud ka bagyo nga pulos naghulga sa Sugbo ug sa Piyesta Senyor.

Matod ni Tabada ang nag-ung-ong nga LPA may kahigayonan nga mahimong labing una nga bagyo karong tuiga nga nganlan og “Auring” karong adlawa (Sabado, Enero 7) ug sundan dayon sa laing LPA sa Huwebes sa sunod semana (Enero 12), tulo ka adlaw sa di pa ang Piyesta Senyor, nga kun mahimong bagyo nganlan og “Bising.”

***

Nipasidaan si Tabada nga mabagyo o dili ang LPA nga sa akong pagsuwat ini nagkaduol na sa silangang bahin sa Hinatuan, buboan og kusog nga uwan ang Sugbo sa mosunod nga tulo ka adlaw: Ugma, Dominggo (Enero 8), Lunes (Enero 9) ug Martes (Enero 10).

Maong nipahimatngon si Tabada sa minilyon ka deboto ni Senior Sto. Niño gikan sa Sugbo ug kasilinganang mga isla sa di pagkalimot pagbitbit sa ilang mga payong ug ubang pandong aron nga di mahasol sa pagtambong karong weekend sa Novena Masses sa way atop nga Pilgrim Center sa Basilica Minore del Sto. Niño.

***

Ang orihinal nga forecast sa ulohang buhatan sa PAGASA mao nga ang habagatang tumoy sa Sugbo ang maigo sa posibleng bagyong Auring. Apan dihang gipahibawo sa pagtuon ni Tabada, niuyon sila nga mahimong ang Dakbayan sa Sugbo gyud maoy maagian.

Di pa ganahan si Tabada nga molantaw sa mosunod nga posibleng bagyong Bising sunod semana. Sa iyang pagsubay sa rekord sa PAGASA sa nangaging katuigan, niingon si Tabada nga nahiagom og bagyo ang Sugbo kalima na ka higayon sukad sa 1948. Apan sa iyang kaugalingong kasinatian, nahibawo sab si Tabada nga mas daghan nang mga bagyo nga direkta gyud untang moigo sa Sugbo apan sa kataposang gutlo nisimang o nahilis, nga nakapalingkawas sa mga Sugbuanon sa lapad ug pintas nga katalagman.

leo_lastimosa@abs-cbn.com.

ARANGKADA
Philstar
  • Latest
Latest
Latest
Recommended
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

SIGN IN
or sign in with