Pagpili sa tunga
Si kanhi presidente Fidel Ramos ang labing uwahing nitingog pagprotesta sa kalit ug tago nga paglubong sa patayng lawas ni kanhi presidente Ferdinand Marcos sa Libingan ng mga Bayani niadtong udtong tutok sa Biyernes. Giisip niya ang lakang nga dakong insulto sa mga sakripisyo sa kasundalohan. Labi na nga ang armadong kusog ang kakonsabo sa mga Marcos sa lipatlipat nga lubong.
Igo ba ning makapukaw sa kahimangod sa kasundalohan ug bisan sa kapolisan nga sama sa kinabag-an sa katawhan niisip sa lubong ni Marcos nga bugalbugal sa mga bayani nga nakigbisog batok sa diktadura? O igo nang wa pa matuman nga saad pagdoble sa ilang suholan paghipos nila?
***
Wa magpakahilom apan wa say plano nga mobiya sa administrasyon ni Presidente Rodrigo Duterte ang upat ka sakop sa iyang gabinete nga nisupak sa paglubong ni Marcos sa LNMB: silang Bise Presidente Leni Robredo, nga gitudlo ni Duterte nga tagduma sa Housing and Urban Development Coordinating Council, Kalihim Judy Taguiwalo sa Department of Social Welfare and Development, Kalihim Rafael Mariano sa Department of Agrarian Reform ug Liza Maza nga mao karoy pangu sa National Anti-Poverty Commission.
Mosuporta gihapon sila sa administrasyon bisan nagkasungi ang ilang baruganan di lang mahitungod sa lubong ni Marcos kon dili hasta sa extra-judicial killings ug pagtahud sa kababayen-an.
***
Nga mao say baruganan sa mga alyado ni Duterte nga nikondenar sa diktadurang Marcos. Napugos na karon sila sa pagpakahilom o paghinay sa ilang protesta kay nakaambit man sila sa politikanhong gahom nga gisabwag ni Duterte human sa iyang kadaogan niadtong Mayo.
Labing kahibudngan ang pagpakahilom ni Senador Alan Peter Cayetano nga maoy running mate ni Duterte sa niaging piniliay. Gisupak niya ang paglubong sa patayng lawas ni Marcos sa LNMB. Apan siya sab ang labing aktibong tigpanalipod ni Duterte batok sa bisan unsang mga pagsaway. Ang pagpakahilom na ba lang ni Cayetano ang alternatibo sa pagtun sa iyang mga pung?
***
Nasuyop silang tanan sa duwa ni Duterte. Si Ramos makapatuyang sa pagpanaway kay wa na may influencia sa militar ug kapolisan. Bugtong nakapugong sa balikas ni Duterte mao nga siya ang usa sa nakapakumbinser ni Duterte pagdagan pagka presidente.
Silang Robredo, Taguiwalo, Mariano, Maza ug ubang sakop sa administrasyon niapil sab sa duwa. Gikumbinser ang ilang kaugalingon nga di pa karon ang tukmang panahon sa pagbuwag sa administrasyon kay mas daghan silang mahimo alang sa katawhan kon magpabilin sa ilang katungdanan inay nga maglihok nga wa nay gahom. Hinaot nga tukma ang ilang pangagpas. Kay ang labing bug-at nga silot giandam ra ba batok sa mga way kaisog pagpili sa sakto busa niapil sab og kumpayot sa daotan.
- Latest
