DSWD molusad sa pag-apod-apod sa cash relief assistance
CEBU, Philippines — Ang Department of Social Welfare and Development-7 molusad sa pag-apod-apod sa cash relief assistance alang sa 15,766 ka tricycle driver sa tibuok Central Visayas karong Abril 8, 2026 aron matabangan sila sa pagsaka sa presyo sa gasolina tungod sa nagpadayong tensiyon sa Middle East.
Ubos sa Assistance to Individuals in Crisis Situations (AICS) program diin matag kwalipikadong benepisyaryo makadawat og one-time grant nga P5,000 diin tabang kini ngadto sa mga drayber sa pag-atubang sa nagkataas nga gasto sa krudo nga nakaapekto sa sektor sa transportasyon.
Ang payout maglangkub sa siyam ka local government units sa Sugbo ug usa sa Bohol nga naglakip sa mga dakbayan sa Bogo, Carcar, Cebu, Naga, Danao, Lapu-Lapu City, Mandaue, Tagbilaran, Talisay, ug Toledo.
Base sa talaan sa DSWD-7, sa Tagbilaran City adunay 2,959 ka drayber nga makadawat sa ayuda diin sa ipahigayong payout sa City Central Elementary School, 982 ang makadawat; Ubujan Elementary School, 1,002 ang makadawat, ug San Isidro National High School diin 975 ang makadawat. Sa Dakbayan sa Bogo City 1,746 ka drayber ang makabenepisyo sa payout nga ipahigayon sa Bogo City Sports Complex.
Sa Dakbayan sa Mandaue 1,997 ka drayber ang makadawat sa ayuda diin ipahigayon sa Colegio de San Antonio de Padua School Gym ang payout sa 391 ka beneficiaries; 722 ka beneficiaries ang makadawat sa payout sa Opao gym; 517 sa Subangdaku gym, ug 367 sa Jagobiao gym.
Sa Cebu City, 626 ka drayber ang makabenepisyo sa payout diha sa Cebu City Sports Institute.
Sa Lapu-Lapu City, mao ang adunay pinakadaghang benepisyaryo nga 3,855 ka drayber diin ang payout ipahigayon diha sa Poblacion gym. Sa Talisay City, 1,817 ka drayber ang makabenepisyo sa tulo ka venues nga gilangkuban sa Lagtang gym, 551; Poblacion gym, 923; ug Vicenta A. Manreal Elementary School, 343.
Sa Dakbayan sa Naga, 153 ka drayber ang makadawat sa ayuda diha sa Naga tennis court.
Sa Dakbayan sa Carcar, 1,124 ka drayber ang makabenepisyo sa payout diha sa Carcar City gym.
Samtang sa Dakbayan sa Toledo, 1,489 ka drayber ang makadawat sa ayuda diha sa Toledo Sports Complex. BDB BANAT NEWS
- Latest
