MCWD wala nay makuhang tubig gikan sa Buhisan dam

CEBU, Philippines — Wala nay matiti nga tubig sa Buhisan dam sa Dakbayan sa Sugbo matud sa Metropolitan Cebu Water District (MCWD).

Matud ni Minerva Gerodias, tigpamaba sa MCWD nga zero water production na ang Buhisan dam.

Nasayran nga ang Buhisan dam maoy ikaduhang surface water source nga naughan sa tubig tungod sa epekto sa El Niño.

Ang Buhisan dam kanhi maka-produce kini og 6,000 cubic meters nga tubig matag adlaw sa kasarangan nga panahon.

Pipila sa mga residente sa tiilan sa Buhisan dam ang unang naapektohan tungod kay wala nay moagas nga supply gikan sa MCWD ug maayo nalang kay adunay tubod gikan sa bukid nga ilang makuhaan og tubig nga ilang magamit.

Si Gerodias nagkanayon nga gikatakdang mag-deliver og tubig ang MCWD sa mga apektadong dapit.

Gibutyag ni Gerodias nga gawas sa Buhisan dam nahubsan usab ang ilang water source sa Lunsod sa Compostela.

Samtang ang Jaclupan dam nangliki na usab ang yuta ug gikabalak-an usab nga hingpit nang mahubsan diin gikan sa 30 mil cubic meter karon anaa nalang sa 8,468 cubic meters ang makuhang tubig; Lusaran Busay gikan sa 15 mil cubic meters karon anaa na lang sa 7,838 ang makuhang tubig; Lusaran Pit-os gikan sa 15 mil cubic karon 2,289 cubic meters na lang ug Lungsod sa Compostela gikan sa 10 mil cubic meters karon wala nay makuha.

Sa maong kakulangon sa tubig niabot na ngadto sa 63,528 cubic meters ang deficit karon sa tubig ug niabot na ngadto sa 63,528 ka household ang nagproblema na usab karon sa tubig. BDB BANAT NEWS