Vloggers, supporters ilalaglag si VP Sara – Gadon

MANILA, Philippines — Malaki ang paniniwala ni Presidential Adviser on Poverty Alleviation Secretary Larry Gadon na hindi mananalo sa anumang posisyon sa halalan 2028 si Vice Pres. Sara Durterte dahil sa mga vloggers at supporters ng kanyang amang si dating Pangulong Rodrigo Duterte.

Ang “fearless forecast” ni Gadon ay bunsod ng umano’y walang tigil na banat ng mga tagasuporta at vloggers ng dating pangulo kay Pangulong Ferdinand Marcos, Jr. at akusasyon na isa itong drug user.

Kahit pa umano makipagtambalan si VP Sara kay dating vice president Leni Robredo na may milyong solid vote, hindi ito aniya mananalo. Wala anyang Ilocano ang boboto kay VP Sara.

Samantala, sinabi ni Gadon na itinutulak niya ang re-investigatigation sa kaso ng ABS-CBN hinggil naman sa lugar na kinatatayuan ng naturang TV station.

Ani Gadon, pag-aari ng PTV 4 na government channel ang inookupahan ng ABS-CBN. Wala umanong maipakitang titulo ng lupa ang ABS-CBN na matagal nilang inokupa.

Sakaling paboran ng korte nais ni Gadon na gawin itong housing project para sa mga mahihirap.