Damgong natuman

CEBU, Philippines - “Everybody is not given a chance to perform on stage; they only look for the best. Sa MMPAA, we want our students to conquer their fears. We always have a chance to explore our talents, bisa’g unsa pa ang imong edad.”

Sama sa iyang gipamulong, walay kahadlok nga gisagubang sa founder sa Ministry of Music and Performing Arts Academy (MMPAA) nga si Joseph Joshua Musca, 33 anyos ang iyang mga kasinatian sa wala pa niya maabot ang iyang gitungtungan karon. Gibalik-lantaw niini niadtong mga higayon nga gisalikway siya sa mga tawong giisip niyang mga higala. Wala siya magbaton og kalagot kanila apan nagpadayon hinoon siya sa pagkab-ot sa iyang mga pangandoy.

Lumad nga taga Barangay Lahug, Cebu City si Joseph diin ang iyang amahan adunay sakit sa mata sa bata pa sila hangtud nga kini hingpit nga nabuta. Gani sa bata pa, nasayod na ang ilang inahan nga naliwat siya sa ilang amahan apan wala lang niya kini panumbalinga.

Gikan sa Sugbo, nibalhin sila og puyo sa Luzon sa edad nga 3-anyos kay didto na madestino ang iyang amahan. Nagbalhin-balhin sila og puyo didto kay sige og away ang ilang mga ginikanan. Didto sila nagtungha sa Zambales apan gikuha ra sab sila dayon sa ilang amahan ug nibalhin sa Pasay kun diin nag-abang sila og gamay nga balay. Iyang gihulagway nga kun mag-uwan, mosulod ang tubig unya manglutaw ang mga basura. Nagbuwag sa hingpit ang iyang mga ginikanan ug gipili nila sa iyang maguwang nga adto mouban sa ilang amahan. Apan wala makaantos ang iyang inahan ug nibalik ug siya gikuha human sa tulo ka adlaw.

Nakabalita sila nga mibalik sa Sugbo ang ilang amahan hinungdan nga mibalik usab sila og puyo dinhi kay nagbalik na man sab ang ilang mga ginikanan.

Sa ilang pagbalik sa Sugbo, nagpuyo sila sa ad sa baboy diin ila lang kining gitarong. “Si mama na ang breadwinner, maninda og RTW ug alahas. Si papa ang magtrabaho sa balay kay buta na man siya,” sigon pa ni Joseph.

Mitungha siya sa Apas National High School diin niadtong first year siya, miapil siya og dance troupe diin makakwarta siya usahay kun moapil sila og kompetisyon. Human migradwar sa hayskul, mikuha siya’g entrance exam sa Cebu Normal University ug nakapasar. Iyang gikuha ang kursong BSED Gen. Science. Asoy ni Joseph nga pamlite lang ang mahatag sa iyang inahan niadtong nagtungha siya sa kolehiyo, maong naningkamot siya nga makaangkon og scholarship ug tuod man nadawat siya isip sakop sa choir ug natanyagan og full scholarship. Kay wala siyay kwarta kun motungha, mouban siya sa iyang higala nga hilig moapil og mga kompetisyon diin makakwarta sila kun adunay guesting. Mokanta sab siya sa mga kasal aron adunay ikapalit og sud-an sa ila. Niapil sab siya og singing contest ug usa niini mao ang Star In A Million niadtong tuig 2003 ug Pinoy Pop Superstar. Niundang si Joseph og tungha sa 4th year college na siya kay namabdos ang  iyang ate ug gikinahanglan siya nga mangita og trabaho. Apan sa wala pa siya niundang, una na siyang nagtrabaho isip assistant manager sa usa ka fastfood chain sa edad nga 17 anyos. Niadtong tuig 2004 nadawat siya isip voice coach sa Center for Pop apan naundang siya human mahibaw-i sa tag-iya nga nag-part time siya og trabaho isip call center agent. Nakatrabaho sab si Joseph sa training center nga gitukod sa iyang college friends apan wala ra sab siya magdugay kay nagkadugay nagkagamay ang iyang sweldo.

“I feel maltreated kay ilang gibayad nako for 2 months is only P5,000 unya almost everyday ko magtudlo sa mga bata,” asoy ni Joseph.

Ang maong kasinatian maoy gihimo niyang motivation nga ugma damlag magtukod sab siya og kaugalingong tunghaan.

Pag-Abot Sa Mindanao

Gihagad si Joseph sa iyang higala gikan sa Center for Pop nga motrabaho isip assistant voice coach sa Molave, Zamboanga del Sur ug sa walay pagduha-duha iya kining gidawat. Nibalik siya sa Cebu human sa maong raket apan nakadawat siya og tawag gikan sa tag-iya sa maong eskwelahan ug giingnan siya nga tabangan siya’g tukod og kaugalingong eskwelahan didto sa Molave. Gihatagan siya’g kwarta pamlete aron siya makalarga.

Gitabangan siya sa tag-iya sa iyang gitrabahoan sa una ug tuod man natukod gyud ang iyang kaugalingong tunghaan nga iyang ginganlan og Molave Music and Performing Arts Academy diin kasagaran niyang mga estudyante nag-edad og 2-3 anyos. Nangutang siya aron mas mahitsura pa ang iyang shop hangtud nga kini misikat. Giusab ni Joseph ang ngalan sa iyang eskwelahan ngadto sa Mindanao Music and Performing Arts Academy kay daghan na man siya’g branches. Subay sa maong kalampusan, gidaut siya sa iyang higala ug midesisyon nga mobalik dinhi sa Cebu niadtong tuig 2009.

Pagbalik Sa Sugbo

Nangaplay og trabaho si Joseph pagbalik niya dinhi sa Cebu, apan dili na siya madawat kay mahagbong siya sa typing exam kay dili na man siya makakita kaayo niadtong panahona.

“Muadto ko sa CR, mohilak ko, nisugod na didto ang depression nganong dili ko madawat. Ni-apply ko’g janitor pero dili pud ko madawat kay overqualified daw ko,” sigon pa niya.

Nagkaila sila ni Jhade Redulosa, ang business partner niya karon. Giagni siya ni Jhade nga mag-abli og tunghaan dinhi sa Cebu. Ug usa ka tuig ang nilabay, gitukod niya ang Ministry of Music and Performing Arts niadtong tuig 2010. Si Jhade ang nangita og investor aron mosuporta sa iyang gitukod nga tunghaan. Gikan sa may dalan Urgello, nibalhin sila sa Mandaue City. Sa ilang pagsugod sa maong siyudad, mga scholar ang ilang mga estudyante aron mailhan ang ilang  eskwelahan. Nangreklamo na ang mga investor ug nangayo na sa ginansiya apan wala pa sila’y ikahatag. Niduol sila sa JCentre Mall apan gibalibaran sila kay dili sila sikat ug mas gipili ang iladong eskwelahan. Miduol sila sa E-mall ug gidawat sila. Naabot sab sila sa SM Consolacion diin grabe ang ilang kayod hangtod nga nahatag nila ang ginansiya uban sa interes ug penalty ngadto sa ilang investors. Ni-withdraw ang investors dungan sa pagkasikat sa iyang eskwelahan. Sa pagkakaron, ang MMPAA aduna na’y upat ka satellite branches ug duha ka main branches. Ang MMPAA, usa lang ka branch sa ilang company nga Red Fly RM Group Corp. diin laing mga negosyo ubos niini mao ang Red Fly Entertainment Events and Promotion, IMI Learning Center, Red Fly Travel ug New Skin Clinic. Pangandoy nila nga makatukod og resto ug comedy bar

Si Joseph mao karon ang CEO ug President sa maong kompanya samtang si Jhade ang bise-presidente. Paghigugma sa ilang gibuhat mao ang giisip nila nga sekreto nga nilambo ang MMPAA. “If you just really love what you are doing, molambo gyud na siya. We also keep friendship to our clients and our staff,” ni Jhade pa. “We also want to give our students the opportunity to be on stage without being judged nga bati ka’g nawong, bati ka’g tingog, bati ka mosayaw. We give them the opportunity to be enhanced and show to the people that they can do it,” dugang pa niya. Mapasigarbuhon nga gibutyag nila nga ang MMPAA mao na ang nag-unang music school sa Cebu diin nag-offer sila og Voice, Instrument, Acting, Modeling, Dance ug Hosting.

Dugang ni Joseph nga bisan pa man sa tanang pagsulay nga iyang naagian, nagmalampuson siya sa katapusan ug ang MMPAA maoy konkretong ebidensiya sa iyang mga nakab-ot.