BIR ,gisaway ni Rica

CEBU, Philippines — Gipabuhagay  sa aktres nga si Rica Peralejo ang iyang kasagmuyo sa bag-ong requirement sa Bureau of Internal Revenue (BIR) nga ang mga content creator ug uban pang digital earners kinahanglan magpakita sa BIR Registration Seal Badge sa ilang online platforms.

Sa iyang social media post , nipadayag  si Rica  nga nagbayad na siya og buhis sukad sa edad nga 13 anyos, busa gikuwestiyon niya nganong kinahanglan pa siyang mopamatuod sa iyang pagsunod sa obligasyon sa buhis pinaagi sa maong badge.

“ And all of this would have been ok if only hindi tayo ninanakawan. Yung mga magnanakaw walang need patunayan pero ako na nagbabayad ng buwis ever since I was 13 years of age to now, 45, hanggang October 31 ang deadline para sa seal na kailangang ipaskil sa aking platforms. Ang sakit maging Pilipino,” ni Rica pa.

Prayoridad ang career

Gibutyag ni  Atasha Muhlach nga ang iyang trabaho maoy nag-una sa iyang mga prayoridad karon, ug giklaro niya wala siya’y boyfriend .  Sa guesting ni Atasha sa “Fast Talk with Boy Abunda” , gibutyag sa aktres  nga adunay mga nangulitawo kaniya, apan iya kining gisultihan nga naka-focus siya sa iyang career. Sa pagkakaron, busy si Atasha isip bida sa musical  nga “Bongga Ka ‘Day!: The Annie Batungbakal Musical.”

Bag-ong misyon

Mosulod sa bag-ong misyon si Coco Martin isip usa ka undercover taxi driver sa seryeng “Coco Martin’s Sigabo”.Sa iyang bag-ong papel, magpakaaron-ingnon si Coco nga usa ka taxi driver aron matuman ang iyang misyon ug atubangon ang mga hagit nga naghulat kaniya sa dalan.

Mosulod sa The Master Cutter

Dugang mga artista  ang mosulod sa ikaduhang hugna  sa Kapuso series nga  “The Master Cutter” nga gibidahan ni Dingdong Dantes. Lakip sa molugwa sa maong serye kay sila Herlene Budol, Ahtisa Manalo, Tom Rodriguez, Benjie Paras ug Andre Paras. Magsugod ang ikaduhang season sa serye karong  Oktubre 14.