Laagan nga boyfriend

Dear Tito Miguel,

Ako diay si Larena , taga Consolacion ,Cebu duha ka tuig nami sa akong uyab nga si Jovan . Akong problema karon kay ang iyang pagkalaagan. Sige gyud siya og laag uban sa iyang barkada . Dili sad siya ganahan nga mouban ko sa ilang mga laag kay puros sila boys ,ug segurado daw nga ma -out of place ko sa ilang tapok. Bisan asa sila mobakasyon sa nagkalain-laing tourist destinations sa Pilipinas. Hinoun , molaag sad mi, kanang kami rang duha. Ang ako lang ba, basin naay mga tinagoan sila nga magbarkada .Nagsige na lang ko og overthink . Unsa akong buhaton aron mahupas ang akong mga pagduda? — Larena

* * *

Larena,

Wala kay angay buhaton kun dili ang pag-andam sa imong kaugalingon nga posible mahitabo ang imong gikahadlokan. Klaro man nga nalingaw pa imong uyab sa iyang pagka-ulitawo. Wala pa siya matagbaw. Inay nga imong hikawan sa iyang lingaw, pasagdi. Gamita kini nga sukod kun asa siya kutob. Ayaw pangutana, molimod gyud na kun duna man siya’y gitagaon. Ayaw imbestigara ang barkada, sigurado sa imong uyab na modepensa.

Sa laktod, wala ka’y mahimo pagpugong kun duna siya buhaton nga makapasakit nimo. Kun mahitabo gyud imong gikahadlokan, buot pasabot dili pa ikaw ang para niya, nangita pa gud siya’g lain. Ang angay nimo buhaton, tagamtama ang unsa’y naa ninyo karon. Iya man kaha gi-balanse, duna siya’y for the boys nga laag, duna sab kamo rang  duha. Buot pasabot iya sab ka gihunahuna, gihatagan ka’g oras ug atensyon.

Kun pananglit duna man siya’y gitagoan, mahibaw-an ra gihapon na nimo sa panahon nga wa ka mangutana, sa sitwasyon nga wa nimo damha. Busa ayaw na’g overthink, maski unsaon nimo’g hunahuna, dili nimo makontrol kun mamakak, magbudhi o manlingla imong uyab kanimo. Karon kun dili gyud ka mahimutang, buot pasabot wala ka’y pagsalig niya. Biya na kaysa magsige’g mugna’g dautan imong hunahuna. Alkanse ka, layo na ka’g naabtan sa imong imahinasyon, ikaw magkunsomisyon samtang imong uyab nagsige la’g pahiyom. Ayaw’g sandig sa tawo nga wala ka’y pagsalig. —Tito Miguel

Magpatambag ka? Ipada kang Tito Miguel: 0991-318-9366