'Hanggang kailan magtitiis?': Janine Gutierrez banas sa gov't COVID-19 response
MANILA, Philippines — Hindi na lang si Liza Soberano ang vocal sa pagkapika sa itinatakbo ng coronavirus disease (COVID-19) response ng gobyerno sa nakaraang isang taon — sinamahan na rin siya ng kapwa Kapamilya actress na si Janine Gutierrez.
Natataon ang komento ng aktres ngayong nagpapatupad ng bagong lockdowns, curfews at "NCR Plus bubble" restrictions sa Metro Manila at mga karatig na probinsya, dahilan para mahirapan ang ilan kumilos at magtrabaho.
"[N]apaka-walang malasakit naman. [I]sang taon nang nagtitiis ang mga Pilipino. [I]mbis na magbigay ng solusyon, ang maipapayo mo ay mag-tiis parin at wag magreklamo?"
"[H]anggang kelan? [M]asunurin at maintindihin ang Pinoy. [K]ung meron lang sanang matinong maaasahan."
napaka-walang malasakit naman. isang taon nang nagtitiis ang mga Pilipino, imbis na magbigay ng solusyon, ang maipapayo mo ay mag-tiis parin at wag magreklamo? hanggang kelan? masunurin at maintindihin ang Pinoy, kung meron lang sanang matinong maaasahan.
— JANINE ? (@janinegutierrez) March 23, 2021
Hindi naman naiwasan ng aktres na sagutin ang ilang netizens, na animo'y nagdo-downplay ng sitwasyon kumpara sa mga ibang bansa. Sabi kasi ng Twitter user na si @kael1128, hindi lang Pilipinas ang hirap na hirap ngayong sumisipa uli ang mga COVID-19 cases sa Pilipinas, buong mundo raw.
masaya ako para sayo na kaya mong magtiis. pero marami tayong kababayan na ikamamatay ang pagtitiis. ang "reklamo" kong ito, para sakanila.
— JANINE ? (@janinegutierrez) March 24, 2021
Ipinagtanggol naman si Janine ng ilan gaya na lang ni @ComplexClara, habang sinasabing sila-sila nina Liza, Janine at Angel Locsin daw ang dapat iniidolo ng mga kabataan sa ngayon.
Kung mga calibre ni Liza Soberano, Angel Locsin at Janine sana ang iniidolo ng mga kabataan, edi hindi mananalo ang mga katulad ni Duterte at wala sana tayo sa sitwasyong to sa Pilipinas.
— Alt Maria Clara // oustdu30.exe (@ComplexClara) March 23, 2021
Lunes lang nang manawagan ng dagdag ayuda at pagpapabilis ng COVID-19 vaccine para sa mahihirap si Liza, lalo na't walang social amelioration program (SAP) sa kasalukuyang serye ng lockdowns. Sa Amerika raw kasi, nakakatatlong stimulus na ang mga residente habang hindi makalabas ng bahay ang mga Pinoy para kumayod.
Basahin: Liza Soberano binanatan 'kawalang suporta' sa mga dukha ngayong lockdown
Kaugnay na balita: Janine Gutierrez explains ABS-CBN move despite franchise non-renewal
Ayuda at saan ito pwedeng kunin
Ngayong Miyerkules lang nang igiit ng economic think tank na IBON Foundation ang P1.5 trilyong budget mula sa gobyerno para sa "genuine recovery" sa panahon ng pandemya.
Kasama rito ang P10,000 cash subsidies para sa 18 milyong low-incoime families sa susunod na tatlong buwan. Kasama niyan, dapat aniya bigyan ng P101 bilyon ang mga micro, small & medium enterprises (MSMEs) para pondohan ang wage increase ng kanilang mga manggagawa na aabot sa P100 kada araw sa susunod na tatlong buwan.
Nagtukoy naman sila ng ilang pagkukunan ng pondo ng gobyerno gaya ng pag-iisyu ng P300-500 bilyong emergency bonds mula sa mga malalaking kumpanya at mayayamang pamilya — bagay na makakalikom daw ng P1 trilyon. Maliban pa 'yan sa pagre-realign ng P1.1 trilyong budget sa infrastructure at P1.8 trilyon mula sa debt servicing.
Wika pa ng IBON Foundation, pwedeng magpatupad ng wealth tax, pagbabalik ng estate taxes at donor's taxes sa "pre-TRAIN law levels," pagtataas ng income tax ng 2.5% pinakamayayamang pamilya at 2-tiered CIT scheme. Sa ganoon, makakalikom daw ng dagdag na 391.9 bilyon ang gobyerno para sa COVID-19 response. — James Relativo
- Latest
