Sharon ug Robin nagtingog na!
CEBU, Philippines — Puwerting lipaya ni Robin Padilla gumikan kay gitinggan na siya ni Megastar Sharon Cuneta.
Dili pa lang dugay, nipadangat og birthday message si Sharon ngadto kang Robin.
Matud pa sa aktor nga kompleto na ang pagsaulog sa iyang 50th birthday gumikan kay gipasaylo na siya ni Sharon.
“Ayun!!! Kumpleto na ang 50th birthday ng golden boy. Maraming maraming salamat sa iyong pagpapatawad sa akin to napakahalaga nito lalo sa oras na ito ng ating mga buhay,” suma pa ni Robin.
Kahinumdoman nga niadtong 2018 , nahiubos og maayo ang Megastar ngadto kang Robin gumikan kay wala kini molugwa sa concert niya nga “My 40th Year Sharon.”
Lovi hulaman sa ABS-CBN
Hulaman una sa ABS-CBN ang GMA-7 actress nga si Lovi Poe alang usa ka proyekto.
Malakip si Lovi sa usa ka digital series sa iWant nga gipanag-iya sa ABS-CBN.
Makapares niya ang Kapamilya actor nga si Zanjoe Marudo.
Pinoy nakadaog sa Emmys
Usa ka Filipino filmmaker ang nakadaog sa 2019 International Emmys didto sa New York City gumikan sa gimugna niya nga usa ka minuto nga video kalabot sa Muslim student survivor sa kagubot sa Marawi niadtong 2017.
Ang 28 anyos nga si Breech Asher Harani, maoy nakaangkon sa JCS International Young Creatives Award gumikan sa iyang short film nga “Next to Me.”
“Hindi ako makapaniwala kasi, kung iisipin mo, the Emmys is for television di ba? Tapos they opened their doors for short film like this, so thankful ako,” saysay pa ni Harani ngadto sa ABS-CBN News.
Eric Nam mag-concert sa Pilipinas
Nagmaya og maayo ang Pinoy fans sa South Korean singer nga si Eric Nam human nilugwa ang balita nga motikang ang ilang idolo dinhi sa Pilipinas.
Adunay solo concert ang 31 anyos nga singer sa New Frontier Theatre, Quezon City karong January 10, 2020 .
Tipik kini sa iyang Before We Begin world tour. Gawas sa Pilipinas, mag-concert usab siya sa Taiwan, Singapore, Indonesia ug Thailand.
Gi-release karong buwana ang unang Engish album ni Nam nga Before We Begin” ug pipila sa mga unod niini mao ang “Congratulations” ug “Love Die Young”.
Darren migradwar na sa senior high school
Bisan paman sa ka-busy sa iyang singing career , gipaneguro gyud ni Darren Espanto nga dili maapektohan ang iyang pag-eskwela. Malipayong gipahibalo ni Darren nga nigradwar na siya sa senior high school.
“I thought it was impossible to achieve this. Thankful that I did not doubt myself.... Today, I am officially a graduate of SENIOR HIGH and very excited to go through the next level. It is true that HARD WORK PAYS OFF,” suma pa sa iyang IG post.
Nagpasalamat usab siya sa tanang tawo nga nagahatag kaniya og inspirasyon aron dili siya mo-give up.
“Thank you to all the people who helped me and made me believe that I CAN DO IT. You guys know who you are.... truly grateful to each of you. Thank you to my family and most especially to God for the wisdom and guidance. #NeverGiveUp,” dugang post ni Darren.
Ronnie , piloto na!
Opisyal na nga pribadong pilot ang singer nga si Ronnie Liang ug wala niya damha nga paspas ra gyud ang dagan sa panahon ilabi na sa iyang pag-eskwela.
Nakuha na ni Ronnie ang iyang Private Pilot License sa APG International Aviation Academy.
Sa wala pa sudla ni Ronnie ang maong butang, ang pagkanta mao iyang gikabisihan.
Nikisaw ang iyang pangalan sa dihang nisalmot siya kaniadto sa ABS-CBN reality singing search nga Pinoy Dream Academy.
Unang Hirit hosts mi-renew sa ilang kontrata
Ni-renew sa ilang kontrata sa GMA Network ang hosts sa longest-running morning show sa nasud nga Unang Hirit.
Nagsugod ang maong show niadtong 1999 ug padayon gihapon kini nga naglawig. Ang hosts niini naglangkob nila ni Arnold “Igan” Clavio, Suzi Abrera, Lyn Ching-Pascual, Love Añover, Lhar Santiago, Susan Enriquez, Connie Sison, Ivan Mayrina, Luane Dy, Nathaniel “Mang Tani” Cruz, Mariz Umali ug Atty. Gaby Concepcion .
Nitambong sa pag-renew sa ilang kontrata mao sila si GMA Network Chairman and CEO Felipe Gozon, President and COO Gilberto R. Duavit, GMA News and Public Affairs SVP Marissa Flores, FVP for Public Affairs Nessa Valdellon, AVP for GMA Public Affairs Arlene Carnay, ug GMA VP for Corporate Affairs and Communications Angel Javier Cruz.
Hukman karon
Mosikad karong adlawa sa mga sinehan ang mga pelikulang The Heiress sa Regal Films ug Unbreakable sa Star Cinema.Ang The Heiress gibidahan nila ni Maricel Soriano, Janella Salvador, McCoy de Leon ug Sunshine Cruz. Sila usab ni Angelica Panganiban , Bea Alonzo ug Richard Guttierez ang mga bida sa Unbreakable.
Wala’y ideya
Wala sultii sa rason ang mga bitoon sa Sunday PinaSaya kun nganong wagtangon ang maong show. Mosikad sa unang bahin sa Enero 2020 ang programa nga maoy mohulip sa maong programa.
Jomari gireklamo
Usa ka babaye nga ginganlan og Joy Reyes ang nireklamo sa iyang kanhi ka-live in nga si Jomari Yllana nga matud pa niabandonar kaniya ug sa duha nila ka mga anak. Nipasangil usab kini nga duna’y laing babaye si Jomari .
Gipaluyohan sa mga Pinoy
Ginama sa Filipino fashion designer nga si Michael Cinco ang national costume ni Miss Universe Singapore Mohanaprahba Selva nga sul-ubon niini sa umaabot nga Miss Universe 2019. Ang beauty-queen maker nga si Jonas Gaffud usab ang nag-train kaniya.
Angayan maulaw
Nakaingon si Bea Alonzo nga ang ex-boyfriend niya ang angayan maulaw sa napakyas nila nga relasyon. Wala mo-mention og pangalan ang aktres apan tataw nga si Gerald Anderson ang iyang gipasabot.
Pasok ang Typecast
Malakip ang sikat nga banda nga Typecast sa umaabot nga pelikula nila ni Paulo Avelino ug Janine Gutierrez.Nag-ulohan kini og If We Don’t Make It nga ubos sa direksyon ni Prime Cruz. Ang Typecast maoy nagpasikat sa awit nga Will You Ever Learn.
Gidayeg og maayo
Nakadawat og daghang mga pagdayeg si Ryza Cenon gumikan sa iyang self-love campaign . Una na nga gipadayag ni Ryza nga engaged siya sa iyang kaugalingon. Wala matud pa nagdepende sa ubang tawo ang iyang kalipay ug malipayon ra siya sa iyang pagka-single.
Atangi
Adunay mahitabo nga partnership ang CignalTV ug APT Entertainment. Gikahinaman og maayo ang mga proyekto nga ilang pagabuhaton. Aktibo ang APT sa pag-produce og mga show sa telebisyon.
Hurado sa Emmy
Nahimong hurado sa bag-ohay lang nga 47th International Emmy Awards didto sa New York City si GMA First Vice President for Program Management nga si Joey Abacan. Nasayran nga makadaghan na nga higayon nga gihimong hurado si Abacan sa maong kalihokan.
Mipasilong sa Viva
Nipirma si Jerald Napoles og exclusive contract sa Viva Artists Agency sa miaging adlaw. Mao usab kini ang talent agency sa iyang girlfriend nga si Kim Molina. Usa ka comedy movie ang unang project ni Jerald sa Viva Films.
AmboT lang
Wala pa’y ideya sila si Dingdong Dantes ug Janno Gibbs kun kanus-a ipasalida ang Philippine adaptation sa blockbuster Ko rean movie nga A Hard Day . Nasayran nga karong tuiga unta kini ipasalida apan kalit lang nakanselar.
- Latest