Mag- premiere sa Indonesia

CEBU, Philippines – Motikang sila si Kathryn Bernardo ug Daniel Padilla sa Indonesia ug Vietnam alang sa international screening sa ilang box office movie nga “The Hows of Us.” Mao kini ang labing una nga mag-premiere night ang usa ka Star Cinema movie sa maong nasud mao nga dakong garbo kini sa KathNiel. Gawas sa premiere night, mopahigayon sab sila og meet and greet sa ilang fans sa maong nasud.

Nayayay diay

Gibutyag ni Manolo Pedrosa ang rason kung nganong naabot siya sa nataran sa Kapuso network human sa duha ka tuig nga pagpahuway sa showbiz. Suma pa sa aktor nga gipugos siya nga papahuwayon sa trabaho gumikan kay adunay nakita nga burot sa iyang spine. Human sa pipila ka tuig nga pagpahuway, gitawagan niya ang iyang manager tungod kay gusto na niya nga mobalik og arte. Gani, ang tanyag mao ang mobalhin siya sa maong nataran nga iyang gialagaran karon ug dakong kalipay niya nga nakauyon siya sa iyang mga katrabaho.

Gi-eskwelahan gyud

Gitug-an ni Joshua Garcia nga maglisod gyud siya og  iningles karon nga maoy kasagaran niya nga linya sa serye nga Ngayon at Kailanman. Tungod kay tag-as man ang mga linya nga adunay mga iningles, misulod gyud siya og speech class aron nga mahan-ay niya og litok ang mga linya sa maong serye.

Nalingaw sa kape

Gikumpirma ni Matteo Guidicelli nga nagbakasyon sila sa iyang uyab nga si Sarah Geronimo didto sa Italy. Matud pani Matteo nga na-enjoy nila ang ilang pag-istar sa maong dapit ug nalingaw siya sa mga coffee date nila ni Sarah gumikan kay daghan kaayo nga kape ang iyang nainom. Dugang pa ni Matteo nga lami gyud ang kape sa Italy.

Maine nasagmuyo

Nadismaya pag-ayo si Maine Mendoza human nga napalgan niya ang iyang bag nga wala na sa maayong kondisyon. Sa iyang Instagram story na lang niya gipabuhagay ang iyang kasagmuyo  sa  maong panghitabo. Matud pa niya nga pipila lang siya ka minutos nibiya sa iyang tent,  ug mao na lang kini ang iyang naabtan sa iyang pagbalik. Tataw matud pa nga gituyo ang paguba niini.

Gibuking ang ex

Gibuking ni Miss Q and A contestant Nadine “Ikik” Monteverde ang pangalan sa kanhi karelasyon ni Vice Ganda. Si Nadine giingon nga silingan ni Vice sa Tondo ug matud pa nakasaksi gyud kini sa dagan sa kinabuhi sa komedyante. Gani, dakong kakugang ni Vice nga gibutyag gyud sa kandidata ang istorya sa kaagi sa karelasyon ni Vice ug gitug-an sab niini nga  “Buknoy” ang pangalan sa uyab  niini kaniadto.

Glam modelling contest

Nagmugna karon ang Beauty queen-maker ug talent manager nga si Jonas Gaffud og modelling contest. Ang maong contest mag-ulohan kini og GLAM nga magsilbing bag-ong proyekto ni Jonas alang sa tanang mga kababayenhan nga adunay katakus sa modelling. “Gusto ko lang buhayin yung modeling scene, na meron pa rin na ganito. Kasi with the advent of social media, technology, everybody can be a model”, suma pa ni Jonas.

Nataypan si Heart

Pasok ang Kapuso aktres nga si Heart Evangelista sa listahan sa Kate Spade New York’s favorite faces sa New York Fashion Week. Sa Facebook page sa maong ilado nga brand, lakip si Heart sa pito nga nakatala sa favorite attendees sa Kate Spade New York Spring 2019 presentation. Kauban ni Heart sa listahan ang mga ilado nga personalidad sa laing nasud nga sila si Priyanka Chopra, Kate Bosworth, Gillian Jacobs, Elizabeth Olsen, Julia Jones ug Suki Waterhouse.

Gusto makatrabaho

Target sa anak nila ni Carmina Villaruel ug Zoren Legaspi nga si Mavy Legaspi nga  makatrabaho puhon ang iyang suod nga higala sa showbiz nga si Andre Paras. “Kasi he’s really a good friend of mine, and maybe we can have a comedy [show together]. We always get along, and it’s always easy to bond with Andre”, suma pa ni Mavy.

Emoji ra

Gitubag na lang pinaagi sa emoji ang komento nga nadawat ni Meg Imperial sa iyang Instagram kun diin ang usa niya ka gi-upload nga litrato giingnan og “chaka” sa usa ka netizen. Wala na dungagi og tubay ni Meg ang maong komento sa pagkakaron.