Suportado ang bana

CEBU, Philippines – Tsika pa ni Marian Rivera nga  dili ra gyud niya pugngan ang iyang bana nga si Dingdong Dantes kung madayon kini sa pagsulod sa kalibutan sa politika. Suma pa sa aktres nga ang kaayohan ra gyud sa katawhan ang unang tumong ni Dingdong kung mosulod siya sa maong butang.“Walang masamang mangarap lalo na nga kung ikabubuti naman ng kapwa,” matud pa niya.

Andi nadisgrasya

Nadisgrasya si Andi Eigenmann samtang nag-surfing. Nakaangkon og bun-og sa nawong ang aktres.  Matud pa nga kusog kaayo ang balod nga niresulta sa iyang pagkalamba. Nasayran nga nagbase na si Andi didto sa Baler gumikan kay gusto kini makabaton og  simpleng kinabuhi.

Sindikato

Ipaimbestigar gyud ni Willie Revillame ang pagpangilad sa pipila ka mga tawo nga matud pa nangomisyon sa mga tawong gustong mahimong studio players sa programang Wowowin. Matud pa sa TV host nga dili maayo ang maong binuhatan.

Tungod sa buhok

Tsika pa ni Vice Ganda nga duna’y mga higayon nga gikuwestiyon siya inig-agi niya sa immigration counter sa ubang nasud  gumikan kay lahi-lahi ang kolor sa iyang buhok nga lahi og hitsura sa iyang litrato sa visa ug  passport.

Friends ra

Gitataw ni Kisses Delavin ug  Donny Pangilinan nga friends ra gyud sila. Nagkasuod na og maayo ang duha sukad sila nagka-loveteam.  Malakip ang duha sa upcoming series sa ABS-CBN nga  "Playhouse" nga pagabidahan nila ni  Zanjoe Marudo ug Angelica Panganiban.

Album ni Marlo

Nagpanikad na si  Marlo Mortel sa pag-release sa iyang album karong  Oktubre. Usa sa mga unod niini mao ang awit nga 'Sana Ikaw Na Nga'. Gikatakda usab siya mga mag-concert sunod isip kabahin sa promosyon sa iyang album.

Lingaw kaayo

Gibutyag ni Coco Martin nga lingaw kaayo siya  sa set sa pelikulang "Jack Em Popoy" kung diin kauban niya sila si Maine Mendoza ug Vic Sotto."Wala kaming ginawa kundi tumawa ng tumawa sa set. Kapag action naman, tinotodo namin. Kasi sabi namin, pelikula ito; hanggat maari malagpasan natin ang ginagawa natin sa 'Ang Probinsyano,'" suma pa ni Coco.

Nitikang sa Pilipinas

Niabot na sa Pilpinas ang  sikat nga international singers nga sila si Tiffany ug  Debbie.  Mag-concert ang duha ugma sa  Mall of Asia Arena.  Sila maoy nagpasikat sa mga awit nga No More Rhyme, Only In My Dreams ug All This Time.

Settle down

Kung si Vin Abrenica ang pasultion, andam na siya nga mo- settle down sa iyang girlfriend  nga si Sophie Albert. Nagkalig-on ang relasyon sa duha  human sa mga pagsulay nga ilang naagian kaniadto.

Nagpasalamat kang Daniel

Nakugang si James Reid human siya nakadawat og positibong deskripsyon gikan sa laing Kapamilya star nga si Daniel Padilla. Kahinumdoman nga sa usa ka episode sa Gandang Gabi Vice, gihulagway ni Daniel si James nga “ultimate artista.” Mapasalamaton si James sa nahisgotang  mensahe ni Daniel.

Trending ang trailer

Trending sa nagkadaiyang social networking sites  ang trailer sa pelikula nila ni  Angelica Panganiban ug  Carlo Aquino nga  ‘Exes Baggage’ .  Nagpanikad na og maayo ang   ilang fans sa  maong pelikula  gumikan kay subli na nila nga makita nga magpares ang ilang mga idolo sa usa ka proyekto. Giatngan usab ang  pipila ka hugot lines sa maong pelikula.