Unang Queen Size of Cebu

CEBU, Philippines - Matud sa karaang panultihon, ang tinuod nga kaanyag dili makita sa pisikal nga hitsura sa tawo kun dili nagagikan kini sa kinahiladman sa iyang kasingkasing. Lawom kaayo nga panultihon ug lisod tugkaron. Apan matud sa madiksyunaryo, ang kahulogan sa kaanyag mao ang hinugpong nga mga maayong hiyas---sama sa kolor, porma, sukod, kurba, ug dagway---nga makalipay sa intellectual senses sa usa ka tawo. Aduna kini gisunod nga tamdanan nga gitawag og standard nga gidawat ug giuyonan sa katilingban. Pagkakaron, aduna na’y laing kahulogan ang kaanyag. Kini mao ang Queen Size of Cebu.

Matawag nga the other definition of beauty ang Queen Size of Cebu tungod kay nagbuhat kini’g iyang kaugalingong standard of beauty. Lahi kun itandi sa naandang beauty contests, ang Queen Size usa ka eksklusibong bangga sa kaanyag, katakos, ug kautokan nga apilan sa mga dagko kon obese nga mga transgender. Milapas ang maong standard sa academic definition of beauty, busa dili lamang pleasing to the senses kining maong mga dagkong beki, apan pleasing to the soul usab sila. Hinuon wala nila gi-encourage ang pagpatambok, mihatag sila og inspirasyon sa tanang parehas nilang overweight nga bisan pa man sa ilang lisod nga kahimtang, mahimo gihapong mabulokon ang ilang kinabuhi pinaagi sa pag-apil sa mga makahuluganong kalihukan.

Ang Queen Size of Cebu mahitabo dinhi sa Sugbo sa labing unang higayon. Ang coronation night himuon diha sa Pagcor Cebu Teatro Casino sa Waterfront Cebu City Hotel Lahug karong September 21, 7:00 sa gabii. Nasaksihan ang talent ug swimwear competitions niadtong Sabado diha sa Villa Teresita Resort sa Biasong, Talisay City, diin napili nga Best in Swimwear si QueenSize Earth Cyrus Velasco. Tim-us nga 100% battle of talents ang nahitabo knowing nga sila ang matang sa mga indibidwal nga buhaton ang tanan, bisan ang paglatay sa alambre, aron lamang mogawas nga labing maayo. Mobalik sa pagpasundayag ang Top 10 Best Talents atol sa coronation night. 

Kinse ka finalists ang magtigi aron pagsakmit sa gikahinamang korona nga personally designed by no less than the international Cebuano fashion designer Kenneth Harrion. Ang korona hinimo sa Swarovski crystals. Ang mga kandidata,kinsa ang mga hawak nagsugod sa 40 inches ug timbang dili mominus sa 200 pounds, nagrepresentar sa lain-laing planeta. Gilangkuban kini nila ni QueenSize Mercury Marxiah Jimenez, QueenSize Venus Lady Eva, QueenSize Earth Cyrus Velasco, QueenSize Mars Enerva Canasa, QueenSize Jupiter Julia Madrigal, QueenSize Saturn Marva, QueenSize Uranus Janice de Belen, QueenSize Pluto Ann Lopez, QueenSize Ceres Tatiana Agustin, QueenSize Eros Samantha Wilson, QueenSize Chiron Marcie Perez, QueenSize  Vesta Jea Albas, QueenSize  Sedna Lea Victoria Espina, QueenSize Quaoar Aiko Melendez Sanchez, ug QueenSize Neptune Mikaela Adriana.  Ang unang batch sa mga kandidata mga inila sa ilang tagsa-tagsa ka career isip manager, standup comedian, fashion designer, negosyante, ug entertainer. Tulo ka mga titulo ang nagpaabot kanila: QueenSize of Cebu Universe (winner); QueenSize of Terrestrial (first runner-up); ug QueenSize of Aerial (second runner-up). Usa usab sa mga most-exciting special awards to be won mao ang Most Photogenic. Ibase kini pinaagi sa pag-like sa official photo sa most-beautiful candidate nga makita sa QueenSize of Cebu Facebook fan page.

Ang QueenSize of Cebu gihatod sa MoonWalk Cebu, Pagcor Teatro Casino, ug Limerick Productions. Suportado kini sa D’ Beauty Wonderland, Gizmo, Crown Regency, Villa Teresita Resort, ug Harolds Hotel, samtang media partners niini ang DYAR Cebu, The Freeman, ug Banat News Hugyaw. Alang sa ticket sales and reservations, kontaka lang ang 09103052328 / 09056987153 / 09322014276 / 412-2800 o bisitaha ang QueenSize of Cebu 2013 Facebook fan page. (BANAT NEWS)