Erich personal na pinili ni Mario, pero girlfriend sa Thailand ipinakilala na

Wala nang pag-asa si Erich Gonzales kay Mario Maurer. May girlfriend na ang huli at ipinakilala ito ng Thai actor sa Kapamilya actress nang bumiyahe sila sa Thailand para sa shooting ng pelikula nilang Suddenly It’s Magic. Sa nakita ni Erich, bumilib agad siya sa relasyon ng dalawa dahil hindi ito idini-deny ni Mario.

Anyway, isang modern-day fairytale tungkol sa isang sikat na Thai actor na si Marcus (Mario) at simpleng Pinay baker na si Joey (Erich na kapwa naghahanap ng kani-kanilang tunay na kaligayahan ang kuwento ng Suddenly It’s Magic, ang bagong obra ng Star Ci­nema.

Ayon kay Direk Rory Quintos, iikot ang kuwento nito tungkol sa tunay na pag-ibig. “The movie is really about unconditional love,” aniya. “It’s about learning how to let go and set free of the person you love so that he or she could fulfill his or her greatest potential. So when he or she comes back to you, you will really be loved.”

Ibinunyag rin ng director na matapos ma-approve ang concept ng Suddenly It’s Magic, si Mario mismo ang pinapili ng gusto niyang maging leading lady. “They had sent pictures of several Filipino actresses of his generation and Mario was given the chance to choose,” kuwento niya.  “And when I found out that it was Erich, I was really happy because I know how good she is as an actress.” Napabalitang pinili ni Mario si Erich dahil sa angkin nitong kagandahan, ‘very Filipina-looking,’ at sa pagiging talented actress nito.

Ang instant chemistry sa pagitan nina Mario at Erich ay mismong nasaksihan ni Direk Rory sa simula pa lamang ng paggawa ng kanilang pelikula. “On the first day of shooting, first sequence, first shot, right away kitang-kita ‘yung chemistry,” pahayag ng batikang direktor. “Actually, when I had a story conference for both of them, I already saw that there was good chemistry. Bagay na bagay sila! They looked so good together.”

Nang tanungin kung kumusta si Mario bilang aktor, pawang magagandang kuwento lamang ang mayroon si Direk para sa Thai superstar. “What struck me the most was he seemed to be such a nice boy and he is really cute,” aniya. “I think women of all generations would appreciate how cute he is and you’ll actually see in his eyes that he is a good person.” 

Gayundin, saludo rin ang award-winning director sa kanilang bidang aktres. “I’ve worked with her for almost a year in the TV series Maria la del Barrio and we got along very well,” paliwanag ni Direk Rory. “Erich is very young and a very good actress. Marami pa siyang magagawa in the future, I have no doubt that in the future she will bring awards at ang layo-layo pa ng mararating niya sa buhay.”

Kinunan sa dalawang major locations - Ilocos sa Pilipinas at Bangkok sa Thailand, ang Suddenly It’s Magic ay mapapanood na sa mga sinehan nationwide sa October 31, 2012.

Bea biglang naging Good News girl!

Mas pinasiksik, mas pinasigla at mas pinabongga ang paghahatid ng magandang balita si­mula ngayong Linggo sa programang nag-uumapaw sa good vibes – ang Good News!

Matapos maging nominado sa katatapos lang na Catholic Mass Media Awards at PMPC Stars Awards, lalong paiigtingin ng Good News ang pagba­balita ng mga kuwentong hitik sa inspirasyon at impormasyon.

Maki-chika kasama ang award-winning host at broadcast journalist na si Vicky Morales at ang mga Good News girls na sina Bea Binene at Love Anover.  Sila ang mga anghel na tagapagdala ng mga kuwentong magpapangiti at kikiliti sa mga puso ng mga manonood.

Mapapanood ito tuwing Linggo, simula ngayon sa GMA News TV.