Hugyaw nga bridal gown collection ipasundayag sa Fashion 30th

CEBU, Philippines - Ang gipasiugdahan sa Creworks Asia, ang Fashion 30th mupakita na usab og gilas pinaagi sa pagmugna og usa ka fashion show karong hapona, 2:00 PM, diha sa Activity Center sa Pacific Mall sa Mandaue City. Mga matahom nga mga wedding ug bridal gown collection ang ipasundayag. Hugyaw ang maong collection kay ginama kini sa mga ilado ug respetado nga fashion designers dinhi sa Sugbo nga milakip nilang Bernardo Flores, Lemuel Rosos, Harvey Cenit, Romel Pareja, Phillip Tampus, Edwin Alba, Romel Mel Maria Tumulak, Aldwin Guardina, Gretchen Sy, Danny Booc, Kenneth Harion, Maria Elena G., Loriemel Villareal, Cyrus Velasco, ug Dexter Alazas. Murampa ang mga maanyag nga Sugboanang modelo kauban ang tulo ka modelo sa Creworks Asia Manila nga silang Jovellyn Dellomas, Rosherine Bautista ug ang Miss Olive-C Campus Model 2012 female grand winner Rohama Rearte. Sa dili pa sugdan ang programa, adunay mga live mannequins nga magsul-ob sa mga maanindot nga mugna sa mga designers. Si Lemuel Rosos ang modirek sa fashion show ug si Herbert Canonigo ang stage ug venue stylist.