Nagkasabay ang suspensyon at trangkaso ni Iwa

Wala si Iwa Moto sa last presscon ng White Lady at ang biruan, baka pati sa presscon, suspended siya. Suspendido ito dahil pasaway daw at unbecoming for a lady ang ginawa nang minsang gumimik kasama si Jackie Rice na kasabay niyang nasuspinde.

Ayaw maniwala ng press na may sakit ito pero, totoo palang indisposed nang mag-text sa kaibigang reporter na two weeks na siyang may trangkaso. Hindi raw siya gumagaling dahil walang nag-aalaga sa kanya na ayaw naming paniwalaan dahil may Yexel Sebastian siya.

Itinanggi ni Iwang suspended siya pero, hindi masagot kung bakit ilang linggo na siyang ‘di napapanood sa Nuts Entertainment at Posh sa QTV 11.

Tinanong namin si Gian Carlos sa suspension nina Iwa at Jackie pero, wala raw siyang alam. Natawa ito nang sabihin naming mabuti pa ang press alam kung ano ang nangyari sa dalawa.

Showing na sa July 19 ang White Lady at sa July 18 ang red carpet premiere sa SM Megamall. Be there at sumama sa mga unang makakapanood ng horror movie ni Direk Jeff Tan.

* * *

Hindi bothered si Marco Alcaraz sa tsismis na nagpapa-book siya sa mga bading for P120,000 dahil hindi totoo. Flattered pa ito’t mahal daw pala siya at kunwari’y nanghinayang sa big amount na kanyang pinalalampas. Naisip nitong kaya siya natsismis dahil galing siya sa basketball na uso rin ang bookingan.

Ayon kay Marco, may legal siyang trabaho at ‘di na kailangang magpahada sa mga bading para lang magka-pera. Masaya na raw siya sa talent fee niya sa Season 11 ng Love to Love at Ganda ng Lola Ko sa QTV 11.

Per project ang kontrata ni Marco sa GMA7 at kaya siya lumipat dahil maganda ang offer ng network at wala naman siyang regular show sa ABS-CBN. Sinubukan daw niya at masaya siya dahil nagkaroon siya ng chance to work with Ch.7 talents gaya nina Ciara Sotto, Paolo Ballesteros at Valerie Concepion sa Best Friends episode ng L2L.

Incidentally, nagkikita paminsan-minsan sina Marco at ex-girlfriend niyang si Isabel Oli at ang pinakahuli’y nang mag-guest sila sa Sis pero, ‘di sila nag-usap.

"Sana, maging friends kami uli. Sobrang awkward at pangit na nagde-dedmahan kami ‘pag nagkikita. Okey kami ni Paolo (Contis) at nag-uusap kami sa Ganda ng Lola Ko pero, ‘di namin napag-uusapan si Isabel," tsika ni Marco.

* * *

Ang ganda-ganda pa rin ni Hilda Koronel nang makita namin sa shooting ng Eternity. Bale ba’y pumayat ito dahil sa badminton at exercise kaya, lalong lumutang ang ganda. Nang tanungin ng press kung ilang taon na siya, halos ipagsigawan nitong 49 years old na siya.

"I’m almost 50 years old at sa January next year, Golden Girl na ako. I’m so proud of my age at kahit matanda na tayo, may showbiz career pa rin. Kinukuha pa rin ako sa magagandang pelikula gaya nito," pagmamalaki ni Hilda.

Bukod sa badminton at exercise, iniiwasan din ni Hilda ang ma-stress at less fat intake kaya, younger looking pa rin siya. Dahil pumayat, mas may stamina raw siyang magpuyat sa shooting ng pelikula ng Regal na showing sa August 30 sa direksyon ni Mark Reyes.

* * *

Pagod na siguro ang actress na ito sa weekly taping ng kanyang TV show kaya gusto nang tumigil. Nakakadagdag din para mawalan siya ng ganang ipagpatuloy ang show, ang mababang rating nito considering na malalaking artista silang bumubuo ng cast.

Ang kontrata sa network ang pumipigil sa actress na itigil ang show. Naaawa rin siya sa mga kasamang artista at staff na siguradong mawawalan ng trabaho ‘pag nag-decide siyang talikuran ito. Mabuti kung bibigyan sila ng ibang show at ‘di siya magi-guilty.

Kaya, hangga’t makakaya at hindi naman nagrereklamo ang network sa mababang rating ng show, tuloy ang actress sa pagti-taping. Hindi lang nito maintindihan kung bakit hindi magustuhan ng viewers ang show gayong madalas silang mag-reformat.