80-anyos na lolo, pinakamatandang football player sa buong mundo!
ISANG 80-anyos na lalaki sa Australia ang nakapagtala ng world record sa pagiging pinakamatandang football player sa buong mundo!
Kinumpirma ng Guinness World Records na si David Mudge, na nagdiwang ng kanyang 80th birthday noong nakaraang Enero 25 ay may edad na 79 years and 89 days old nang lumahok siya sa Northern Suburbs Football Association match para sa kuponang Kissing Point Football Club laban sa North Turramurra.
Naisipan na mag-apply ni Mudge para sa world record title matapos niyang malaman na ang previous record holder sa titulong “World’s Oldest Competitive Soccer Player” ay may edad lamang na 73.
Ayon sa mga tagapamahala sa Guinness, pasok sa kanilang mga guidelines ang pinasang requirements ni Mudge, isa na rito ay ang participation niya sa isang full 90-minute game.
Nagsimulang maging football player si Mudge noong 1958 nang sumali siya sa Northern Suburbs Football Association.
Taong 1974 naman siya napabilang sa kasalukuyang team niya na Kissing Point Football Club. Bukod sa pagiging football player, naging club president at treasurer din siya nito. May panahon din na siya ang namahala ng canteen at barbecue ng club.
Natutuwa at proud sa sarili si Mudge dahil bukod sa napabilang siya sa Guinness Book of World Records, isa siya sa nagpatunay na ang edad ay hindi hadlang sa mga pangarap sa buhay.
- Latest