Mga buslot sa Sara SALN
Bisan wala pa maablihi ang bank accounts nga gikatahong dunay binilyon ka pesos nga mga deposito ug mga transaksiyon, konbikto nang daan si Bise Presidente Sara Duterte kon ang mosunod nga mga buslot sa iyang statements of assets, liabilities and net worth (SALNs) ang basehan:
Dakong burot sa iyang net worth gikan sa P7.2 milyones sa 2007 ngadto sa P98.6 milyones sa 2025 dili ikapasabot sa iyang suweldo pagka bise mayor, pagka mayor ug pagka bise presidente (nga niabot lang og P30 milyones) ug kita sa mga negosyo (gamay rang ginansiya sa iyang mga kompaniya, alkanse pa ganing uban ug nideklarar og “no-income” ang ilang law office), maong kinahanglan nga ipasabot diin gikan ang P60 milyones nga discrepancy;
* * *
Iyang SALNs sa katuigan nga bise presidente na (2022-2025) nilista sa gipanag-iya nga mga kompaniya nga klarong kalapasan sa pagdili sa 1987 Constitution sa presidente, bise presidente ug mga sakop sa gabinete sa pag-negosyo samtang naghupot sa puwesto (apil nang kompaniya nga nakadaog og minilyon ka pesos nga kontrata sa catering sa Davao City Hall ubos sa iyang manghod nga si Mayor Baste Duterte);
Wala ilista sa iyang SALNs ang kapin 50 ka mga armas nga narehistro sa Philippine National Police (PNP) sa iyang ngalan ug sa iyang bana nga si Atty. Mans Carpio;
* * *
Napakyas pagsumiter og SALN sa 2013, sukwahi sa Republic Act 6713 ug guidelines sa Civil Service Commission nga kinahanglang mosumiter og “exit SALN” 30 ka adlaw human napupos ang iyang termino sa pagka mayor sa Hunyo 30 niadtong tuiga (samang atraso maoy nakapalagpot ni kanhi Chief Justice Maria Lourdes Sereno, nga gigukod sa iyang amahan nga si kanhi Presidente Rodrigo Duterte, pinaagi sa quo warranto niadtong 2018);
Pagdeklarar og zero cash on hand ug cash in bank sa iyang SALNs sugod sa 2019 hangtod sa 2025 ug igo na lang nipalusot ang iyang mga abogado nga gilumpong niya og lista sa “others”; ug
Kapakyas pagbutang og acquisition cost sa 20 ka mga kompaniya nga gilista sa iyang SALNs (nga nakapatumaw sa pagduda nga undervalued ang iyang net worth ug nga posibleng singka ug impluwensiya ray iyang puhonan sa mga kompaniya).
* * *
- Latest
