EDITORYAL — Kalamposan sa BARMM

Karong naa nay napiling mga lider ang katawhan sa Bangsamoro Autonomous Region in Muslim Mindanao human sa ilang Parliamentary elections niadtong Lunes, makahuygo na ba kaha ang paglambo sa ilang mga lugar?

Nitingog na ug nipili na ang kapin duha ka milyones ka botante kung kinsa ang gusto nila ug gituohan nilang morepresentar kanila para matubag ang ilang mga yangungo nga dugay na nilang gipasangil sa nasudnong kagamhanan nga wala mahatag kanila nga mao say nagtukmod kanila sa pagrebelde.

Ang pangutana nalang kung natagbaw ba sila sa resulta sa eleksyon sa ilang lugar? Panahon na unta karon nga magtinabangay sila para sa kaayohan sa ilang mga lugar.

Daghang nanggawas nga akusasyon batok sa gobiyerno nga nanghilabot sa maong eleksyon, apan walay kongkretong ebidensiya bahin niini.

Pero bisan pa man ani, ang mga konstituwente ra gyud maoy makasanta o makapa-pakyas sa gobiyerno kung ugaling nanghilabot kini, pinaagi sa ilang boto.

Malaumon ang gobiyerno nga pinaagi aning gitawag sa mga taga didto nga genuine autonomy dili parehas sa gisundan nilang Autonomous Region in Muslim Mindanao (ARMM), mahunong ug mahilom na ang buto-buto sa armas.

Nahuman naman ang eleksyon, angay lang nga sugdan na nila ang pagplano sa kaugmaon sa BARMM.

Ang ARMM bisan pa man sa pagka-imperpekto niini kaniadto, nag-abli kadto sa pultahan para maporma ang BARMM. Wala kato magkadimao tungod pud sa kasungian sa mismong mga lider nga gipang-botaran sa mga tawo didto batok sa ubang hut-ong sa ilang katilingban ilabi na sa grupo sa mga rebeldeng Moro Islamic Liberation Front.

Base sa resulta aning bag-ong eleksyon, ang BARMM  pamunoan na kasagaran sa mga kanhi lider sa MILF gikan sa nagkalain-lain apan managkaribal nga political parties, apan naa na silay otonomiya  kun unsaon nila pagdumala ug kun unsaon nila pagka-sinabot.

Sa laktod pagka-estorya, gihatag na sa gobiyerno sa mga kamot sa mga napiling 80 ka lider sa BARMM Parliament ang renda sa pagdala sa ilang probinsya basi sa ilang pagtuo, balaod, ug kultura basta dili supak sa nasudnong mga balaod, polisiya ug dili hulga sa seguridad.