Mas sayon bugawon ang iring

Matud pa sa tigpamaba ni Bise Presidente Sara Duterte nga si Atty. Paolo Panelo, andam ug tagana ang bise president nga mohulip kang Presidente Marcos, Jr., sa higayon nga moresign ang naulahi sa iyang katungdanan. Nalatid sa Konstitusyon kining pamahayag ni Atty. Panelo apan kuli kaayo kining mahitabo kay gani gitawag man kin isa Palasyo nga “delusional”.  Kay matud pa bitaw, “Mas sayon pa ang pagbugaw sa iring nga nag-atubang sa kaldero’ng puno sa inon-onan kay sa pagpa-resign sa presidente.” Muleeng!

Pabayran bisan nayabo

Namahayag si Murang Kuryente Paty-list Representative Arthur Yap nga human mopagawas ang BIR sa Revenue Memorandum Circular 97-2026 nga nagtangtang sa 12% nga VAT sa allowable system loss charges sa billing sa kuryente, panahon na usab nga mopanday na ang kongreso ug senado sa balaod nga hingpit na nga magtangtang sa system loss charge.  Gilantaw sa mga konsumidor nga usa ka dakong tinonto ang pag-imponer sa mga power utility companies og sytem loss charges.  Ang padayon nga pagtingil sa system loss charges, “Sama ra nga gipabayad ka tag-iya sa restaurant sa sabaw nga nayabo tungod sa kadanghag sa waiter.” Madahaan!

“Bantay-dawat”

Mipalabang og ordinansa ang konseho sa San Francisco, Camotes, Cebu nga nag-gahin sa 28 ektaryas nga Southern Poblacion Marine Reserve diin gidili ang pagpanagat sa maong reservation samtang nagtugot sa regulated nga pagpanagat sa palibot niini.  Gitumong ang maong ordinansa sa pagpanalipod sa marine habitats ug paghatag higayon nga maka-recover ang mga kahinguhaan sa maong marine reservation. Apan matud pa sa mga tigpaniid, “Wala gihapo’y pulos ang mga reservation kay kunsabo man ang tigbantay kinsa modawat og bahin sa mga mananagat, busa, inay “bantay-dagat”, nahimo na silang “bantay-dawat.” Fezteleern!

“Ube trafficking, lisod sumpoon?”

Gisuportahan sa Samahang Industriya ng Agrikultura (Sinag) ang polisiya sa Department of Agriculture (DA) nga temporaryong nagsuspendi sa pag-export sa lagutmon nga ube (purple yam). Giluwatan ang maong polisiya sa DA aron mapreserbar ang mga igtatanom nga ube ug mapalapdan usab ang domestic production.  Apan bisan pa man sa kamanduan sa DA, nagtoo ang mga mag-uuma nga malisod kini nga ipatuman kay sayon ra man ang pagpayuhot sa gagmay’ng hiwa sa ube nga maoy himoong planting materials. Matud pa bitaw, “Naglisod man gani og sumpo sa human trafficking, “ube trafficking” pa kaha.” Saoonz!

Adunay drayber ug gasolina

Gihatagan na og pagtugot sa DILG ang Cebu Provincial Government nga mopalit og duha ka sea ambulance nga nagkantidad og P50 milyones.  Gilaraw nga i-deploy ang duha ka emergency vessels, ngadto sa Camotes Island Group ug didto usab sa Bantayan.  Dakong tabang kini sa katawhan sa mga naasoy’ng lugar kon madayon kining maong proyekto sa panahon sa emergency. Hangyo lang sa katawhan nga, “Hinaut nga dili kini gamiton sa pagsuroy-suroy sa mga turista ug bisita ug hinaut usab nga aduna kini kanunay igahin nga “drayber” ug gasolina." Pagkatoytoy!