CAFGU member, ginang, utas sa ambush
COTABATO CITY, Philippines — Napatay ang dalawang katao kabilang ang isang miyembro ng Citizens Armed Forces Geographical Unit (CAFGU) nang sila ay pagbabarilin habang sakay ng motorsiklo nitong Miyerkules sa Barangay Chinese Pier sa Jolo, Sulu.
Kinilala ang mga nasawing biktima na sina Junior Pacolanan Medalle, isang CAFGU member, at ang kasamang si Nuraiza Usman Anni.
Sa ulat ng pulisya, magkaangkas sina Medalle at Anni sa motorsiklo at pagdating sa nasabing lugar ay niratrat sila ng mga armadong kalalakihan na nakaabang sa kanila.
Nang bumulagta ang dalawa ay mabilis na tumakas ang mga suspek na sakay ng motorsiklo.Nasamsam sa lugar ng insidente ang mga basyo ng .45 caliber at 9 millimeter pistols.
Inaalam pa ng mga kinauukulan kung sino ang mga salarin at kung ano ang motibo sa pagsagawa ng pamamaril.
- Latest
