Pilgrim naligo sa Mt. Banahaw, nilamon ng ilog
MANILA, Philippines — Patay ang isang 69-anyos na lola na kanilang mga pilgrims matapos malunod habang naliligo sa ilog sa paanan ng Mt. Banahaw sa bayan ng Dolores sa lalawigan ng Quezon kamakalawa ng hapon.
Kinilala ang biktima na dumayo lamang sa lugar na si Vicenta Castillo, residente ng Makati City.
Sa report ng Quezon Police, nangyari ang insidente bandang alas-2 ng hapon sa Brgy. Sta Lucia sa isang ilog ng dinarayong Mount Banahaw.
Ayon sa ilang nakasaksi sa pangyayari, kasalukuyang naliligo sa ilog si Castillo, ang Lola nang bigla siyang tangayin ng malakas na agos.
Tuluy-tuloy na nilamon ng ilog ang matanda at may ilang oras ding hinanap ng search and rescue team.
Ang bangkay ng matanda ay narekober ng search and rescue team makalipas ang ilang oras.
Nabatid na ang biktima ay kasama sa mga pilgrims o mga namamanata na dumarayo sa milagrosong ilog sa Mt. Banahaw partikular na sa Brgys. Kinabuhayan at Sta Lucia; pawang host ng puestos (sagradong lugar) na sumisimbolo ng kabanalan ng nasabing bundok sa hanay ng mga namamanata.
Kaugnay nito, pinag-iingat ng mga awtoridad ang mga pilgrims na dumarayo sa Mt. Banahaw para maiwasan ang kahalintulad na disgrasya.
- Latest