SUV vs trak: 2 utas, 7 sugatan
GUMACA, Quezon, Philippines — Dalawa ang patay at pitong iba pa ang malubhang nasugatan makaraang banggain ang sinasakyang Innova ng isang Elf sa intersection ng Barangay Bagong Buhay at Pipisik, kamakalawa.
Nagtamo ng grabeng kapinsalaan sa kanilang mga ulo at katawan at kapwa idineklarang dead-on-arrival sa RAKK Hospital sina Romel Ramboyong at isang hindi pa nakikilalang lalaki.
Ginagamot naman sa nabanggit na ospital ang mga biktimang sina Rolando De Antonio, 61, driver ng Innova (NBB-9719), nakababatang kapatid na si Rodolfo,60; Adrian Marcal; Danilo Dominic; Rochelle Stephanie Periabras, 4; at hindi pa nakikilalang lalaki at babae.
Ayon sa ulat ng pulisya, bandang ala-1:30 ng madaling araw ay minamaneho ni Rolando ang Bicol bound at lulan ang walong iba pa, subalit pagsapit sa intersection ay binangga sila sa gawing kaliwa ng Isuzu Elf na minamaneho ni Michael Landed, 28, ng Valenzuela City.
Dahil sa lakas ng pagkakabangga ay makailang ulit na bumaligtad ang Innova.Nasa kustodya na ng pulisya ang driver ng Elf at nahaharap sa mga kaukulang kaso.
- Latest
