Trader pinasok, inutas sa harap ng misis

SARIAYA, Quezon, Philippines — Patay agad ang isang negosyante makaraang pasukin at pagbabarilin ng mga hindi kilalang lalaki sa harap ng kanyang misis sa loob ng kanilang bahay sa Sitio Pook, Brgy. Sampaloc  2, kamakalawa ng gabi.

Ang biktima na nagtamo ng mahigit sa 10 bala ng kalibre 45 sa katawan at ulo ay kinilalang si Ejay Marasigan, 27.

Sa ulat, alas-10:30 ng gabi habang nano­nood ng telebisyon ang biktima kasama ang asawa nang biglang pumasok ang dalawang hindi nakikilalang lalaki habang ang dalawa pa nilang kasama ay pumuwesto sa labas ng bahay at nagsilbing lookout.

Nang makita ng mga suspek ang biktima ay agad na pinaulanan ng punglo at bago tumakas ay tinutukan pa ng baril ang misis ng huli.