Brodkaster itinumba sa Pangasinan
MANILA, Philippines — Isang radio broadcaster na nakaligtas sa tangkang pagpatay, may apat na taon na ang nakalilipas, ang natuluyan matapos pagbabarilin ng riding-in-tandem assassins malapit sa kanyang bahay sa Brgy. San Blas, Villasis, Pangasinan kahapon.
Kinilala ni Major Christian Alucod, hepe ng Villasis Police Station ang napatay na si Virgilio “Vir” Maganes na isa ring manunulat ng The Northern Watch, isang lokal na pahayagan sa lalawigan.
Sinasabing bibili lang ng pandesal para sa umagahan si Maganes nang tambangan ng mga hinihinalang berdugo dakong alas-6:30 ng umaga.
Siniguro ng gunman na patay na si Maganes matapos barilin sa ulo at iba’t ibang bahagi ng katawan saka mabilis na tumakas.
Nabatid na unang nakaligtas si Maganes sa tangkang pagpatay noong Nob 8, 2016 nang barilin siya ng mga ‘di kilalang suspek habang sakay ng traysikel ang una patungo sa kanyang programa sa radyo sa Dagupan City. Nilagyan pa umano siya dati ng karatula na “drug pusher huwag pamarisan”.
Dalawang drug personalities na pawang at large ang tinukoy at kinasuhan ng awtoridad sa unang pagtatangka sa buhay ni Maganes.
Kinondena naman nina Presidential Task Force on Media Security (PTFoMS) Executive Director Usec. Joel Sy Egco at Presidential Communications Operations Office (PCOO) Secretary at PTFoMS Co-Chair Martin Andanar ang pagpatay sa nasabing mamamahayag.
Si Maganes ay naitala na ika-18 na mediaman na napatay sa panahon ni Duterte.
- Latest
