4 boat operator missing kay ‘Ursula’

MANILA, Philippines — Apat na boat operator ang iniulat na nawawala sa Santa Fe, Bantayan Island sa paghagupit ng bagyong “Ursula” sa hilagang Cebu nitong MIyerkules sa pagdiriwang mismo ng Pasko.

 Sa inisyal na ulat ng Cebu Provincal Disaster Risk Reduction and Management Office (CDRRMO), nakikipagkoordinasyon na ang Provincial Disaster Risk Reduction and Management Office (PDRRMO) sa lokal na Disaster Risk Reduction Management Office sa Santa Fe upang alamin ang sinapit ng nawawalang mga boatmen.

 Samantala, nakabalik na ang isang mangingisda na una nang napaulat na nawawala sa Daanbantayan, Cebu.

 Ang Bantayan Island at Daanbantayan ay kapwa nasa ilalim ng Signal No. 3 sa pagbayo ng bagyong Ursula sa kasagsagan ng Pasko.

 Nasa 8,800 pamilya o kabuuang 44,000 katao ang inilikas sa mga evacuation centers sa Daanbantayan dahil sa banta ng storm surge dulot ng malalakas na pag-ulan at hangin sa paghagupit ng bagyo. Samantalang maging ang mga DRRM personnel ay inilikas sa Municipal Cultural Center matapos matanggal at ilipad ng malakas na hangin ang bubungan ng kanilang tanggapan.