18-anyos kinatay ng kainuman
CAVITE, Philippines — Tadtad ng saksak nang madatnan ng mga rumesponde ang isang 18-anyos na binatilyo matapos umanong katayin ng kainuman kahapon ng madaling araw sa Brgy. Calibuyo, Tanza, ng lalawigan.
Patay na bago pa man madala sa pagamutan ang biktimang si John Paolo Domingo, construction worker, ng Brgy. 42-B, Cavite City.
Naaresto naman ang suspek na nakilalang si Edison Ramos, 20-anyos, construction worker ng nasabi ring lugar. Sa imbestigasyon ni P/SSgt Yves S. Luyun, ala-1:40 ng madaling araw kapwa mga lasing na lasing ang biktima at suspek nang mapikon ang huli sa kadaldalan ng una.
Gamit ang kutsilyo, inundayan ng saksak ng suspek ang biktima matapos mapikon. Duguang bumulagta ang biktima na nadala naman sa Tanza Family Hospital subalit idineklara siyang dead-on-arrival. Nabatid na hapon pa lang ay nagsimula nang mag-inuman ang dalawa kung kaya mga lango na sa alak nang maganap ang insidente.
- Latest