Van tumaob: 3 patay, 16 sugatan
Sa STAR Tollway
MANILA, Philippines — Nasawi ang tatlong katao kabilang ang dalawang estudyante habang 16 na pawang mga mag-aaral din ang sugatan matapos na tumaob ang sinasakyang pampasaherong van habang bumabagtas sa kahabaan ng STAR Tollway sa Lipa City, sa lalawigan ng Batangas, kahapon ng umaga.
Kinilala ni Police Chief Insp. Wilfredo Sacmar ng Highway Patrol Group ang mga nasawi na sina Maxine Guinevere Vivas, 17, Ma. Kristina Paula, 18; pawang mga mag-aaral ng Senior High School of De La Salle Lipa, at ang driver ng van na si Danilo Manalo, 68.
Agad namang naisugod sa pagamutan ang 16 na sugatan na mga estudyante rin ng nasabing paaralan upang malapatan ng lunas.
Sa inisyal na ulat ng pulisya, dakong alas-6:30 ng umaga habang binabagtas ng Nissan commuter van (NDS 6161) lulan ang 19 na pasahero ang kahabaan ng STAR Tollway sa bahagi ng Southern Tagalog Arterial sa Brgy. Bugtong na Pulo, patungo sa Batangas City nang biglang sumabog ang isa sa mga gulong nito dahilan upang mawalan ng kontrol sa manibela ang driver.
Bunga nito ay bumaligtad ang behikulo na ikinasawi ng dalawang estudyante at driver habang nasugatan naman ang iba pang pasahero
Patuloy ang masusing imbestigasyon ng mga otoridad sa kasong ito.
- Latest
