60-anyos lolo sinaksak, sinunog

QUEZON, Philippines – Kalunus-lunos na kamatayan ang sinapit ng 60-anyos na lolo matapos saksakin ay sinunog pa ng mga di-kilalang lalaki saka inabandona sa gilid ng highway sa Barangay Guisuis Talon, bayan ng Sariaya, Quezon kamakalawa ng umaga. Palaisipan ngayon sa mga awtoridad ang motibo sa pagpatay sa biktimang si Estanislao Umali ng Barangay 9 sa Lucena City. Ayon sa ulat, dakong alas-6:45 ng umaga nang natagpuan ang bangkay ng biktima nakahandusay sa gilid ng Eco-Tourism Road kung saan halos hindi na makilala dahil sa sunog ang mukha at ibang bahagi ng katawan. Pinaniniwalaang pinaslang sa ibang lugar saka inabandona sa madamong bahagi ng nasabing barangay para ilihis ang imbestigasyon ng pulisya.