Mister pinugutan sa inuman

MANILA, Philippines - Karumal-dumal na kamatayan ang sinapit ng isang mister matapos itong pagtulungang saksakin at pugutan ng magkapatid sa gitna ng inuman sa Purok 3, Barangay Mojon, bayan ng San Jose, Antique kamakalawa ng gabi.

Sa ulat na nakarating kay P/Senior Supt. Celestino Guara, Antique PNP director, kinilala ang napatay na si Julius Mistas ng San Remegio, Antique.

Samantala, pinaghahanap naman ang magkapatid na suspek na sina Roberto Ymon, 27; at Imbo Ymon, 23.

Nabatid na inimbitahan ng mga suspek na uminom ng alak ang biktima sa kanilang bahay sa nasabing barangay.

Gayon pa man, nang malango sa alak ang tatlo ay sumiklab ang mainitang pagtatalo kung saan pinagtulungang saksakin at pagtatagain ang biktima.

Hindi pa nakuntento matapos na mapatay ay pinugutan pa ang biktima saka itinapon na may anim na metrong layo ang ulo mula sa katawan nito.

Sinisilip ng pulisya ang anggulong paghihiganti matapos na mapaslang ng biktima ang isa sa mga kamag-anak ng mga suspek.