Sanggol, kapatid natusta sa sunog

GENERAL LLANERA, Nueva Ecija, Philippines – Malagim ang sinapit na kamatayan ng dalawang magkapatid kabilang ang isang 3 buwang sanggol matapos na makulong ng apoy sa loob ng nasusunog nilang tahanan sa Brgy. Mabini ng bayang ito kamakalawa ng umaga.

Halos nagmistulang u­ling ang mga biktimang  sina Alejandra Asuncion, 8-anyos, Grade 2 pupil at ang 3-buwang gulang na bunso nitong si Princess Asuncion.

Sa imbestigasyon ng pulisya, nabatid na bandang alas-11 ng umaga noong Sabado, kasalukuyang tinutupok ng apoy ang bahay na gawa sa mahihinang uri ng materyales ng mag-asawang Alejandro, 39, at Marissa, 40.

Wala umano sa naturang bahay ang mag-asawa at naiwan ang magkapatid sa bahay. Natutulog umano ang munting sanggol habang nagluluto naman ng kanilang tanghalian ang nakatatandang anak ng mag-asawa.

Hindi pa malinaw sa ulat kung ang pagluluto ng biktimang si Alejandra ang naging sanhi ng pagsiklab ng apoy na naging sanhi ng pagkamatay nilang magkapatid.

Kapwa nagsaad naman ang mag-asawa na hindi sila interesado na magsagawa ng medico legal exam ang awtoridad sa bangkay ng kanilang yumaong dalawang anak.