QUEZON, Philippines - Halos maputol ang leeg at kapwa namatay ang dalawang trabahador sa farm matapos na karitin at saksakin ng kapwa trabahador sa Sitio pulo, Barangay Banglos ng bayan ng General Nakar, Quezon, kamakalawa ng hapon. Kinilala ng pulisya ang mga biktima na sina Michael Chavez, 27, ng Barangay Catamblingan; at Josie Sta. Ana, 27, ng Barangay Pamplona habang naaresto naman ang suspek na si Paulo Llaneta, 40, ng Ragay, Camarines Sur. Sa imbestigasyon ni PO2 Mhadelick Astejada, dakong alas-2 ng hapon ay magkakasamang nag-aani ng mga prutas ang mga biktima at suspek sa farm na pag-aari ni Engr. Vengie Villanueva. Sa hindi malamang kadahilanan ay bigla na lamang sinaksak ng suspek si Michael at kinarit pa ang leeg. Upang itago ang krimeng ginawa ay hinila ng suspek ang bangkay ng biktima sa damuhan subalit nakita siya ni Josie. Sinaksak din si Josie at kinarit din ang leeg hanggang mamatay at nagtangkang tumakas subalit nainguso siya ng iba pang kasamahan sa pulisya.