Mag-utol na bata lunod sa septic tank

CAMP VICENTE LIM, Laguna, Philippines — Napaaga ang salubong ni kamatayan sa mag-utol na bata matapos mahulog at malunod sa hinukay na poso-negro na puno ng tubig sa bayan ng Imus, Cavite noong Lunes ng hapon.

Kinilala ni PO1 Dennis Magsaysay, investigator ng Imus PNP, ang mga bikti­mang sina Maricris Lao Ang, 5; at Mikee Lao Ang, 4 , kapwa nakatira sa Sitio Pulo, Anabu 2C, sa na­bang­git na bayan.

Ayon sa police report, ini­wang natutulog ng ka­nilang ina ang magkapatid sa loob ng kanilang kuwar­to para sunduin sa paara­lan ang isa pang anak nito bandang alas-4 ng hapon.

Laking gulat na lang ng ina nang pagbalik ng ka­nilang bahay ay natag­puan ang dalawa na pa­lutang-lutang sa hukay na may lalim na 5-talampakan para sana sa ginagawa nilang septic tank.

 “Posibleng naglaro ang mga bata sa hukay na ’yon hanggang sa ma­hulog ang mga ito at ma­lunod,” pa­hayag ni PO1 Magsaysay.

Itinakbo pa sa De La Salle University Hospital ang dalawang bata pero idineklarang patay.