2 patay sa pananambang

CAMP CRAME — Dalawa-katao ang iniulat na nasawi makaraang tambangan ng mga ’di-kilalang kalalakihan ang sasakyan ng mga biktima sa kahabaan ng highway na sakop ng Sta. Maria Village sa bayan ng Calapan, Oriental Mindoro kahapon ng umaga. Sa ulat na ipinadala ni P/Senior Supt. Agrimero Cruz Jr., provincial police director ng Oriental Mindoro, nakilala ang mga biktima na sina Denia Malubay Saraste, 53, fish vendor at Fermin Labi, 53, jeepney driver, pawang nakatira sa Bayan ng Baco. Malubha namang nasugatan si Belinda Matricepris, 58. Base sa report naganap ang naturang pananambang dakong alas-7:30 ng umaga habang sakay ng pampasaherong dyip (DDE-748) ang mga biktima. (Edwin Balasa at Arnell OZaeta)