Killer ng vice governor tukoy na

CAMP CRAME — Tinukoy na kahapon ng pulisya ang pangunahing suspek sa pagpatay kay Kalinga Vice Governor Rommel Diasen na kumakandidato sa pagka-gobernador sa nalalapit na May 14 elections.

Kinilala ni P/Chief Supt. Geary Barias, kumander ng Task Force Usig, ang suspek na si Joel Melod, 18, miyembro ng tribong Magnao-Lubuagan at residente ng Barangay Magnao.

Ayon kay Barias, anggulong tribal conflict ang isa sa motibo ng pagpaslang kay Diasen matapos na makatanggap ng impormasyon na hinamon ng mga kasamahan si Melod na patayin ang kandidato bilang paghihiganti sa pagpatay sa isang hukom.

Ang hukom na tinutukoy ng grupo ni Melod ay si Judge Milnar Lammawin na pinaslang noong 2004 at ang pinagbibintangan ay ang grupo ni Diasen.

Matatandaang noong Sabado de Gloria ng hapon ay pinagbabaril si Diasen, habang nagtatalumpati sa Magnao Barangay Hall sa bayan ng Tabuk. (Edwin Balasa)