Marcos inaprubahan ang pasukan sa July 29
Sa school year 2024-2025
MANILA, Philippines — Inaprubahan na ni Pangulong Ferdinand Marcos Jr., ang pabubukas ng klase sa July 29, 2024 at magtatapos sa April 15, 2025 para sa school year 2024-2025.
Sinabi ng Presidential Communications Office (PCO) na ang hakbang ng pangulo ay bilang tugon sa panawagan ng publiko na ibalik ang pasok sa eskwela sa dating nakagawian na school calendar.
Sa sectoral meeting ng pangulo sa Department of Education (DepEd) sa pangunguna ni Vice President Sara Duterte na kalihim ng DepEd, inaprubahan ang pagbubukas ng klase ng Hulyo 29, 2024 at magtatapos ng Abril 15, 2025.
Ito ang simula nang dahan-dahang pagbalik sa school year na Hunyo ng kada taon at magtatapos ng Marso ng susunod na taon.
Sa naturang sectoral meeting, iprinisinta ng Bise Presidente sa pangulo ang dalawang opsyon para sa pagbabago ng calendar year, kung saan ang unang opsyon ay binubuo ng 180 school days na may 15 in person Saturday classes habang ang ikalawang opsyon ay 165 school years na walang in person Saturday classes na parehong magtatapos ang School Year March 31, 2025.
Subalit, sinabi ng Pangulo na ang 165-day school calendar ay masyadong maiksi at mababawasan ang bilang ng school days at maaaring makompromiso ang resulta ng kaalaman ng mga estudyante.
Ayaw din anya ng Pangulo na pumasok ang mga estudyante ng Sabado para makumpleto ang 180-day school calendar dahil malalagay sa alanganin ang well being ng mga estudyante at mga guro at nangangailangan din ng resources.
Dahil dito, kaya inadjust ng DepEd ang pagtatapos ng klase mula sa Marso 31, 2025 ay ginawa itong Abril 15, 2025 para makumpleto ng mga estudyante ang 180 days kahit walang klase ng Sabado.
- Latest
