Duterte, Alvarez namumuro sa ‘sedition’

MANILA, Philippines — Maaaring kasuhan ng sedition sina dating Pangulong Rodrigo Duterte at Rep. Pantaleon “Bebot” Alvarez dahil sa kanilang mga panawagan na ihiwalay na ang Min­danao sa Pilipinas.

Ito ang sinabi nina Camiguin Governor Xavier Jesus “XJ” Romualdo at ang ama na si Rep. Jurdin Jesus “JJ” Romualdo sa panukalang paghihiwalay ng Mindanao mula sa iba pang bahagi ng Pilipinas na isang malinaw na sedisyon at labag sa 1987 Konstitusyon.

Binigyang-diin ng mag-ama na ang Saligang-Batas ay tuwirang nagtatanggol sa pambansang soberanya at teritoryal na integridad ng Pilipinas, na nagbabawal ng anumang anyo ng pag­hihiwalay o paghati.

Idinagdag pa nila na ang Camiguin, isang islang probinsya sa Nort­hern Mindanao, ay mariing tututol sa plano ni Duterte na hatiin ang bansa para sa kanyang sariling interes.

Idinagdag ni Gov.Romualdo na malinaw na si Duterte at Alvarez ay naglalaro ng mapanga­nib na mga pahayag at gimik upang guluhin at hatiin ang bansa para sa kanilang sariling interes.

Kasunod nito, hinihimok ni Rep. Romualdo ang kanyang mga kasamahan sa House of Representatives na imbestigahan at kung kinakailangan ng ebidensya simulan ang proseso ng pagsuspinde laban kay Rep. Alvarez para sa kanyang papel sa pagsusulong ng paghihiwalay ng Mindanao.