Krisis sa bigas, lulubha sa 2024

MANILA, Philippines — Higit umanong lulubha ang krisis sa bigas sa susunod na taong 2024, ayon sa Federation of Free Farmers (FFF).

Sinabi ni FFF National Chairman Raul Montemayor na ito ay dulot nang patuloy na pagtaas ng halaga ng retail price ng bigas kahit na panahon ng anihan ng palay sa bansa.

Anya,makakaranas ang bansa ng kakulangan ng suplay ng bigas sa buwan ng Pebrero at Marso bago ang dry season harvest at sa buwan ng Hulyo hanggang Setyembre ng susunod na taon.

Sinabi ni Montemayor na kahit na may peak palay harvest season simula Oktubre 2024 , mayroon magaganap na pagtaas sa retail price ng bigas dahil  hindi na kasingdami ng ani ng palay ng mga magsasaka ngayon dahil sa mga kalamidad at el niño phenomenon bukod sa wala namang aasahang malakihang importasyon ng bigas na papasok sa Pilipinas para punan ang malaking demand ng mamamayan sa bigas.

Anya, sinasabi na kapag may anihan ng palay ay bababa ang presyo pero hindi naman ito nangyayari dahil patuloy ang pagtaas ng presyo ng bigas.Ang farmgate price ng palay sa ngayon ay P30 per kilo. Tumataas ang farmgate price ng bigas dahil sa kakulangan ng suplay.

“ About two to three months from now, what would be our situation especially with the El Niño, our dry season crop in March and April would be affected and it could be worse in July, August and September, during the lean months next year,” sabi pa ni Montemayor.

Sa DA monitoring sa mga palengke sa Metro Manila, ang  retail price ng local regular milled rice ay umabot na sa P56 per kilo; ang local well-milled rice ay P55 per kilo; local premium rice ay P60 per kilo at ang local special rice ay P68 per kilo. Umaabot naman sa P58 per kilo ang imported well-milled rice at ang imported premium rice ay P69 per kilo habang ang imported special rice ay P65 per kilo.