Tigil-pasada ng Piston, tuloy hanggang miyerkules
MANILA, Philippines — Magpapatuloy hanggang sa Miyerkules ang 3 araw na tigil-pasada na sinimulan kahapon ng transport group na Pinagkaisang Samahan ng mga tsuper at Operators Nationwide (PISTON).
Ito ang sinabi ni Ka Mody Floranda, Pangulo ng Piston, nang hindi nagustuhan ang pahayag sa kanila ni LTFRB Chairman Teofilo Guadiz na pag-aaralan lamang nito ang kanilang mga demands.
Anya, walang direktang sagot at balewala lamang ang ginawang pakikipag-usap nila kay Guadiz kahapon habang nasa pagkilos sa may Araneta Avenue kanto ng E Rodriguez Avenue dahil sinabing pag-aaralan lamang ng LTFRB ang demand nilang pagpapahinto ng deadline sa December 31 consolidation, pagbabalik sa limang taon ng kanilang prangkisa at pagbasura sa PUV modernization.
Iniulat din nito na ngayong Martes ng ala-1:00 ng hapon ay magsusumite ang Piston ng formal documentation sa LTFRB para sa mga nailatag na demands sa ahensiya sa pamamagitan ng kanilang abogado na si Atty Ariel Inton.
Dinagdag pa ni Floranda, na ayaw nila sa PUV modernization dahil ang mga malalaking negosyante lamang ang makikinabang dito. Inihalimbawa nito ang P2.8 milyong halaga ng aircon jeep na kailangan nila para makapag-operate ng pampasaherong sasakyan kung sasailalim sila sa modernization program.
Mas mainam anya na wala na ring consolidation upang mahawakan pa rin nila ang kanilang prangkisa na binayaran nila ng may ilang panahon mula sa LTFRB.
Ang pagkakaroon anya ng franchise ay nasa batas alinsunod sa RA 4136 o Transportation Law, samantalang ang Modernization program ay alinsunod lamang sa isang memorandum order ng Department of Transportation.
- Latest
