Kamara balik sa F2F ops, pagkalipas ng 3 taon
MANILA, Philippines — Matapos ang tatlong taon ng pagsailalim ng bansa sa state of public emergency dulot ng matinding epekto ng pandemya sa COVID-19 ay balik na muli sa full face-to-face na operasyon ang Mababang Kapulungan ng Kongreso sa Lunes alinsunod sa ipinalabas na Memorandum Order ni House Speaker Martin Romualdez.
Magugunita na una nang tinanggal ni Pangulong Ferdinand “Bongbong” Marcos Jr., ang public emergency pagkaraan namang makahulagpos na ang bansa sa matinding epekto ng pandemya.
Sa kasagsagan ng COVID-19 ay limitado lamang ang mga mambabatas na dumadalo sa sesyon sa plenaryo bilang pagtalima sa health protocols tulad ng social distancing habang ang iba pa ay via zoom. Ipinatutupad ito maging sa mga pagdinig ng komite.
Base sa memorandum na inisyu ni Romualdez, ang sesyon sa plenaryo ay isasagawa ang full face-to-face.
Sa kabila nito, bukas pa rin ang liderato ng Kamara sa opsyon ng recording sa attendance ng mga mambabatas sa sesyon at maging sa nominal voting sa pamamagitan ng mga cellphones at maging sa social media platforms.
Sa mga pagkakataon naman na imposible na magkaroon ng quorum sa attendance ng mga mambabatas ay maaaring isagawa ang sesyon sa pamamagitan ng electronic platforms.
Idinagdag pa dito na maaari rin ang livestreaming sa sesyon sa plenaryo sa pamamagitan ng opisyal na accounts ng Kamara.
Ipinag-utos din ni Romualdez na ang mga Committee meetings, kumperensiya at mga pagdinig ay kailangan ding isagawa ng face-to-face.
- Latest